كود هند لكلاوي مراكش ///

فهادي عامين خسرات السياحة فبلادنا حسب المجلس الجهوي للسياحة بمراكش الصويرة الحوز شي 82 مليار درهم. من اسباب هاد الخسارة لكبيرة اغلاق المجال الجوي. قرار الحكومة الغبي تسد الحدود باش تحبس متحور “اوميكرون” اللي داير حالة فالبلاد دابا.

هاد القرار كانت عندو مآسي اجتماعية كبيرة. عدد من لمغاربة المقيمين بالمغرب ماشي المقيمين بالخارج وحتى اجانب مقيمين بالمغرب حصلو برا. الحكومة دخلات غير ديال تركيا والامارات والبرتغال وخلات الاف حاصلين برا. هادي 3 اشهر والحدود مسدودة بلا شي مبرر شاد فراسو. غير الاغرب فهاد الشي هو ان وزير الخارجية اللي الوحيد اللي عندو السلطة يعطي رخص دخول الطيارات الخاصة للبلاد٬ عطى ل4 شركات رخص يتكلفو بنقل لمغاربة او الاجانب. هاد المارشي ولى محرك بزاف. اللي عندهم الامكانيات وقادرين يخلصو جوج مليون من مالگا جنوب اسبانيا لطنجة او كازا٬ يمكن يجيو فهاد الطيارات. طبعا ماشي جوج مليون تجي بوحدك فالطيارة. خاص تكون الطيارة الخاصة يكونو بلايصها عامرة. سواء كتهز 4 او حتى 8 اشخاص. حسب الكونفور والنوعية …

تصورو فنهار واحد هادي اسبوع دخل لكازا ومراكش 10 طيارات خاصة. نحسبو كل وحدة جابت ما بين 6 و 8 راه اكثر من 60 شخص عندو امكانيات دخل للبلاد.

اش هاد التخوار. كيفاش تحبسو البلاد على لمغاربة وتفتحوه للي عندهم الامكانيات. خاص للي حصلو برا يدعيو وزير الخارجية.

دابا مع لعياقة والتحقير لهاد لمغاربة شي ملايرية عايشين فكازا بداو كيكريو طيارات باش يخرجو يدوزو عطلهم ويرجعو. طبعا بهاد الطريقة السي بوريطة كيقتل السياحة المغربية جوج مرات. كيحرمها من سياح يجيو من برا وكيعاون اللي عندهم لفلوس هنا يدوزو عطلهم فالصبليون ومنها لدول اخرى.

الكارثة ان هاد الفضيحة كاينة والمعارضة السياسية مادياها غير فالقشور. ما مسوقاش كاع لهاد القطاع