كود كازا ///

فاطمة الزهراء عمور وزيرة السياحة كانت اليوم فتوقيع ميثاق الاغلبية بالمقر المركزي لحزب التجمع الوطني للاحرار بالرباط. يعني انها رجعات من الصبليون اللي كانت حاصلة فيها. وفق معطيات حصلت عليها “كود” دخلات السبت فالليل فدجيت بريڤي. وهادي معقولة ماشي فرحلة استثنائية.

ووفق مصدر “كود” فاعضاء الوفد اللي كانو معاها فنشاط بمدريد بالصبليون دخلو فرحلتين نهار الاحد، بجوجهم دخلو فدجيت بريڤي.

وحسب مصدر من هاد الوفد ل”كود” فكاع اللي مشاو لمدريد خداو قبل مواقفة من وزارة الخارجية وطبعا خداو موافقة باش رجعو.

مع قرار اغلاق الحدود الجوية والبرية كتبقى غير وزارة الخارجية هي الجهة الوحيدة اللي كتمنح للطيارات اللي يدخلو للمطارات المغربية الرخصة.

يعني كلشي خداوه من عند وزارة الخارجية اللي وزيرها كان نهاية الاسبوع فسويسرا وداز لهنغاريا دابا.

دابا هو اللي فيدو يخلي لمغاربة للي حاصلين برا يرجعو لبلادهم. القرار ديال الحكومة راه اغلاق المجال الجوي فيه استثناء تنظيم رحلات كيف اللي كديرهم دابا بعض الدول الاوربية باش تنقل مواطنيها من المغرب لبلدانهم.