كود- كازا//

وزارة الصحة وزارة التربية الوطنية وتكوين الأطر والتعليم العالي والبحث العلمي ماغاديش يتعاتقو مازال مع المؤسسات التعليمية، وقررو انهم يبادرو بإغلاق هذ المؤسسات فورا، إلى تبين ليهم أن الأطر والإداريين والمتعلمين مامحترمينش وسائل الوقاية والتباعد الاجتماعي ومادايرينش الكمامات.

وقالت الوزارتين، فبلاغ مشترك ليهم حصلات عليه “كود”، أنها غادي تراقب مدى الالتزام ديال هذ المؤسسات بهذشي، سواء كانت عمومية أو خصوصية، أو جامعات أوثانويات أومدارس او مؤسسات التكوين المهني، وغادي يتم تخصيص لجان لهذشي.

ولزمات الوزارتين على المتعلمين والمتدربين يوضعو الكمامات بشكل إجباري، ويستعملو جيل ليدين أو يغسلو يديهم بالما والصابون، ويكون بيناتهم التباعد الجسدي فالفصول الدراسية وففضاء المؤسسة وفالدخول والخروج.