كود هناء ابو علي ////

وذكاء كبير عند هاد رئيس الحكومة الامين العام لحزب العدالة والتنمية. مشى البارح عند”هسبريس“٬ وقال باللي اللي قالو عمر هلال ممثل المغرب لدى الامم المتحدة حول قضية تقرير مصير منطقة القبايل الجزائرية “ماشي موقف سياسي للدولة المغربية”.

واضاف باللي هاد الشي داخل ما سماه “رد فعل حجاجي علي الجزائر”: “هذا كان رد فعل لسفير المغرب في الأمم المتحدة، ليس موقفا سياسيا يعبر عنه، وإنما هو رد فعل حجاجي، إذا كنتم تقولون كذا فإنه كذا، هو ليس موقفا سياسيا للدولة المغربية”.

المشكلة ان هاد الشي اللي صرح بيه نبعرفة مادام كان كيهدر بكاسكيطة رئيس الحكومة ماشي امين عام الحزب٬ جا وهو عارف ان جريدة معروفة بقربها من الجيش والمخابرات فالجزائر وهي “الشروق”٬ خرجات كتهدد المغرب. هدرات على ما سمته “قرارات جريئة مرتقبة” غادية ديرها الجزائر ضد المغرب ومنها “فرض تأشيرات على المغاربة” و”تعليق الرحلات” واجراءات اخرى بدات كتبان.

اي ان رئيس الحكومة فهاد الازمة لكبيرة ختار يهبط السروال للجزائريين للي كيهددو المغرب بقرارات اخرى عوض ما يكون عندو خطاب مهاجم لهاد التنعت

كنعرفو انو باش كان وزير الخارجية فالمرحلة الاولى من حكومة بنكيران وبالضبط نهار لثلاث 24 يناير 2012 قرر بطلب منو يمشي للجزائر بكل سذاجة. تلاقى رئيسها انذاك بوتفليقة. يهدر ديك الهدرة الخاوية بلا ما يكون عندو معرفة بالملف. النتيجة انهم ضحكو عليه ورسلو وخلاوه بحال شي بله. كلشي عاقل على تصريحو الساذج اللي كيهدر فيه على “علاقات متميزة وأخوة كاملة” بين البلدين وباللي “البلدين يعيشان مرحلة جديدة”.

انت انتي فالخارجية وبينتي على فشلك اش داك تهدر فالسياسة الخارجية. دخل سوق راسك. ها هما ردو عليك وخرج جاوبهم دابا