الرئيسية > آراء > وحيد ومشكلة الاحتياط.. بانت فماتش الگابون وتقدر تعذبنا أكثر إيلا خسرنا شي لعاب أساسي
19/01/2022 19:00 آراء

وحيد ومشكلة الاحتياط.. بانت فماتش الگابون وتقدر تعذبنا أكثر إيلا خسرنا شي لعاب أساسي

وحيد ومشكلة الاحتياط.. بانت فماتش الگابون وتقدر تعذبنا أكثر إيلا خسرنا شي لعاب أساسي

مصطفى الشاذلي – كود //

رابح جوج ماتشات وماجربش كَاع اللعابة. وحيد خاليلوزيتش قرر فماتش الكَابون يبدل أكثر من نص الفرقة ويشوف مستوى الاحتياطيين، حتى لهنا الأمور عادية وطبيعية، اللي ماشي عادي هو كيفاش أن طريقة اللعب منعات المنتخب يتحكم فالماتش، بل العكس بقا كيقبل فاللعب فمراحل كثيرة من المقابلة.

نبداو بالدفاع ديال أسود الأطلس، اللي عرف تواجد لعاب ماعمر كان عليه إجماع هو سفيان شاكلا، اختيار غريب ديال وحيد كان يقدر يعوضو بمدافع آخر من البدية، ولكن هو راهن على أنه يلعب بيه من اللول هاد الماتش. سفيان شاكلا ماعطلش وحيد وعاقبو على اختيارو، ماكندويوش هنا على الزلكَة اللي ممكن طرا لأي لعاب ولكن فالماتش كلو.

خسر شاكلا جميع النزالات تقريبا، لا فالسما لا فالأرض، كان مايتوقفش مزيان فالعرضيات وتا فالكرات الثابتة، وبان أن الماتش كبير عليه، ونايف أكَرد هو ثقل الماتش كلو وتحط فوضعيات صعبة باش يغطي على شاكلا.

ندوزو للوسط اللي ماعرفتش آش بغى يصنع منو وحيد؟

لعب بإلياس الشاعر صانع ألعاب وما معاه تا جناح، السيد تلف وهو راجع من إصابة وصدق مخرجو فنص ساعة وزعزع شوية من الثقة ديالو، علما أن الشاعر كان لاعب محوري فالإقصائيات وكيعرف يلعب مع الجناب.

ندوزو للهجوم اللي عرف أكبر تخربيقة من نهار جا وحيد، لاعب بجوج رؤوس حربة، الكعبي والنصيري، وزائد أنهم مامفاهمينش مع بعضياتهم وماعمرهوم لعبو مع بعضياتهم، وكيمشيو بجوج للكرة ولا كيتخباو عليها، آش كان كيتسنى وحيد من هاد الثنائية؟ ماعرفت.

إيلا كان باغي يرد الثقة للمهاجمين ويصالحهم مع الشبكة، فالأسلوب اللي اختار ماعمرو كان غيوصلهم باش يماركيو، اللعابة بجوج كيلعبو حسن لكان حداهم لاعب خفيف ومهاري، ومايمكنش يعطيووك أكثر من داكشي اللي دارو.

الكعبي اللي ديما موالفين منو التضييع فالمناسبات الكبرى، والنصيري اللي مزال ماردش النيفو ديالو وخارج ذهنيا من جو الماتشات وزايدها كيطلق تصريحات غريبة هاد الأيام، ماجاش منهم الحل خلال هاد الماتشات اللي دازت، وإيلا بقينا معولين عليهم ماغنكونوش فالمستوى المطلوب ديال نمشيو لأبعد نقطة فهاد كاس إفريقيا. لا ضيعتي كتخلص تم نيت وبالزربة.

المغرب ضيع فرصة ديال الكعبي مباشرة تلعبات زلكَ شاكلة وتماركات علينا، وفالأدوار المقبلة الستريس كيطلع وماشي كل مرة تقدر ترجع بالخف فالماتش.

طبعا كانو نقاط ضوء، منها عز الدين أوناحي، يلاه 21 عام، وثاني مقابلة ليه مع المنتخب وماخايف من تا واحد كيلعب طرونكيل بواحد الأريحية كبيرة وكيخرج كورة نقية، والحارس المحمدي ردنا للماتش البارح فأكثر من مناسبة، ويمكن نعولو عليه كاحتياطي ممتاز، وطبعا أشرف حكيمي كيف ديما، لعاب ديال الفخامة، اللي يقدر يردك فالمقابلة بحركة وحدة.

وقت التجريب سالا دابا، ووحيد غيدخل فالمعقول مع المنتخب الوطني المغربي، نتمناو وباء كورونا تبعد عليهم هي والإصابات، لأن بالاحتياط اللي كاين القضية صعيبة بزاف.

موضوعات أخرى

28/03/2024 09:00

محكمة فالصبليون برأت المتهمين فقضية لكسيدة اللي ماتو فيها 8 ديال المغاربة ف اسبانيا عام 2008

28/03/2024 07:00

سمية الخشاب دخلات طول وعرض فبرنامج الكاميرا الخافية ديال رامز جلال: هادي جريمة كيعاقب عليها القانون

28/03/2024 03:00

السروال ديال مقدم برنامج بريطاني داير أزمة فكوريا الجنوبية.. ها شنو دارت القناة ديالهم- فيديو

28/03/2024 02:00

مصور عندو 71 عام اتاهم الوالد ديال تايلور سويفت أنه تعدا عليه بالضرب ملي كان كيصورها