كود كازا ///
كيفاش فرقة بحال الاتحاد البيضاوي: الطاس وصل بيها الحال حتى ولات كتحتافل بالعودة للدوزيام ديفيزيون احتفال ما كيليقش بالفرقة. الاحتفال كان خاصو يكون فالحي المحمدي كولو. كان خاصو يديرو الجمهور. يديروه الناس ماشي يجيب الرئيس الفارماصيان الدقة المراكشية وعبيدات الرمى وحتى الخيل. اش هاد الشي. الطاس رجعات بعد فراغ كبير تجمعات فيه عوامل كثيرة ولكن راه فرقة مرتابطة فالوعي الجماعي لسكان الحي المحمدي.
هاد الرئيس على يمشي يجمع ناس الحي على فرقتهم. يجمع السكان على فرقتهم٬ حقاش هاد الشي هو المهم٬ مشى كيقلب على الشعا. على تسويق صورتو هو ونسى تاريخ هاد الفرقة.
اييه مزيان يكون عبد الرحمان اليوسفي حاضر للماتش الاخير واخا اليوسفي ما عمرو عطى لهاد الفرقة اللي ساهم فوجودها٬ شي حاجة. ولكن خاص الناس دالحي اللي عندهم بصاح غيرة على ناديهم يكونو حاضرين.
الطاس تستاهل اكثر من طموح رئيس كيشوف حدا نيفو. اللي بان فاحتفال بملعب الشهداء البارح الاحد مصطانع بزاف. احتفال ما كيشبه لا تاريخ لا صورة هاد الفرقة عند ناس الحي
