كود كازا ///

مستقبل لمغاربة مع هاد الجايحة فيديهم لحد الان. فيد كل واحد منهم. تصرفات كل مغربي مغربي تقدر تنقد ماشي غير العائلة بل البلاد كلها. مع العيد لكبير كثار يبغيو يسافرو. هاد التنقل يقدر يكون كارثي لينا كلنا. اللي فبلاصة يبقى فيها حتى دوز راه موجة جديدة من هاد المرض ضربات الصبليون.

هاد الدولة اللي كانت تقريبا غبر منها “كورونا فيروس” وصلات البارح لاكثر من 900 حالة وماتو فيها شي 3. السلطات الصحية كتهدر على موجة جديدة. غاديين يديرو اجراءات اكثر صرامة باش يحيمو بلادهم.

فالجارة الشمالية لاسبانيا اليوم كيدرسو امكانية اغلاق الحدود. فرانسا خايفة وممكن يزيدو اجراءات صارمة جديدة.

هاد الشي جا مع ارتفاع عدد المصابين بالفيروس ل15 مليون فالعالم. فيروس قتل لحد الان كثر من 600 الف شخص. من البلايص اللي دار فيهم هاد الفيروس حالة هي امريكا اللاتينية.

عدد الاصابات فهاد الدول فات 4 مليون حالة، غير لبرازيل بوحدها وفنهار واحد سجلات اكثر من 67 الف حالة ومات فنفس النهار 1284.

فالبيرو الوضعية اكثر كارثية. بلاد صغيورة وعدد الوفيات فات 10 الاف. هاد البلاد تقريبا نهار كولو. ما بقاوش بلايص فالصبيطارات وولاو كيديرو الاوكسجين لحالات خطيرة فطونوبيلاتهم ولا يجيبو گياطن ديالهم. وضعية صعيبة بزاف. ثمن البوطا ديال الاوكسجين انتاقل من 65 اورو لاكثر من 200 اورو. الناس كتجيب بوطات ديالها للصبيطارات باش تعالج الحالات اللي خاصها الاوكسجين. اللي ما عندوش خاصو يتسنى ايلى مات شي حد. الموت كثيرة فهاد البلاد. كلشي كيخلع