الرئيسية > آراء > وا لعجب لعجاب: جلسة ف البرلمان تدارت لمهاجمة الدارجة.. كاع الاحزاب اعتبراتها تهديد للهوية المغربية
25/09/2018 20:30 آراء

وا لعجب لعجاب: جلسة ف البرلمان تدارت لمهاجمة الدارجة.. كاع الاحزاب اعتبراتها تهديد للهوية المغربية

وا لعجب لعجاب: جلسة ف البرلمان تدارت لمهاجمة الدارجة.. كاع الاحزاب اعتبراتها تهديد للهوية المغربية

بن أحمد -كود//

هادشي اللي وقع اليوم ف البرلمان عجيب و غريب وماعمرو وقع  ف أي دولة اخرى ف العالم ولا ف اي زمن من الازمان.

برلمانيون من كل الاحزاب: اغلبية و معارضة، كلهم بلا استثناء اجتمعو اليوم ف اطار لجنة التعليم و الثقافة مع وزير التربية الوطنية أمزازاي و بداو ف المداخلات على قضية جوج كليمات ديال الدارجة اللي كانت ف  واحد الكتاب مدرسي ديال الابتدائي، وكلهم  بحال الا ماعرفينش ان الدارجة كتستعمل  فالتعليم ف كل المواد  علمية و ادبية و  تقنية بل و حتى لتدريس الفرنسية ف شي بلايص، و  من الابتدائي حتى للجامعة .. بكل بساطة لانها لغة المغاربة و بها كايتواصلو..

كلهم هاجمو والدارجة و اللي كايضحك انهم اعتبروها تهديد للهوية المغربية … بحال الا هي لغة شي عدو و حنا كنهضرو شي لغة اخرى.. اييه لغة الغيوان و الملحون و الشعبي و العيطة و الاغاني الكلاسيكية المغربية  تهديد اسيدي للهوية المغربية..

ممثلة حزب الاتحاد الدستوري قالت الدارجة ضرب لهويتنا، و ممثل التقدم و الاشتراكية  قال الدارجة غير مضبوطة بحال الا هو كبير المختصين ف اللسانيات و قال ليك لايمكن التدريس بها، اما ممثل البيجيدي فقال ان الدراجة دخيلة على الكتب المدرسية، و تشويش على الدخول المدرسي.. و ممثل حزب الاستقلال قال انه الحزب غادي يوقف ضد اي محاولة  و بلا بلا بلا…

هادشي مبالغ فيه بزاف، ماعمر كاين شي شعب او ممثليه  كايكرهو لغته اللي كايهضر بها  يوميا و يغني بها و يعيش بها.. هي بحكم الواقع ، وخصهم يمكن يضربو طليلة ف الواقع باش يعرفو بلي هي لغة التعليم و النحقيق ف الكوميسريات و الجلسات ف المحاكم،  بل ان لغة  نقاشات البرلمان  براسو كتدار بالدارجة، و المغاربة ماتصالحو مع السياسة حتى ولا بنكيران كايهضر بالدارجة بدل لغة الفصحى اللي تاحد مكيعرف شنو كايتقال بها وكانو كايتدارو بها تصريحات الوزراء للاعلام للغميق  على الشعب،  كل هاد النقاش و ردود الفعل غير علمية و غير منطقية  وماهي الا محاولة من الاحزاب للتماهي مع موقف تبناتو صفحات فايسبوكية- تاهي كتستعمل الدارجة –  يسيرها مراهقون  وعامرة بالكدوب و الفايك نيوز و الفوطوشوب..وهادشي محزن بزاف حيث كايبين ان ممثلي الامة تا هما  راه غير ساكنين مساكن  ف الفايسبوك و تاهما باركين ” اب اب جنود ” و  “طاكي عشيرك” .. بدل ما يستدعيو الخبراء للشهادة  بحال كاع  كما كتدير البرلمانات  ف العالم.

نساو بلي الدارجة هي اللغة باش كايهضرو المغاربة من قرون من نهار اختلطو العرب مع الامازيغ  فهاد البلاد،هي كانت لغة نشرة اخبارية من الستينات، بل اللغة باش كايخاطب الملك  الراحل الحسن الثاني شعبه طيلة مدة حكمه ، هي لغة برنامج محو الامية من عشرات السنين..ولكن شنو نديرو مع هاد الانفصام و هاد الاعاقة اللغوية اللي ولينا فيها.

 

 

 

 

موضوعات أخرى

29/03/2024 00:00

نقابة الصحافة زادت دروس أخرى على دروس “الهاكا” فقضية فبركة جريمة شفرة على المباشر.. كنبهو للانزلاقات الكثيرة لي كتوقع فعمل بعض الإذاعات الخاصة ويجب إعادة النظر فالقانون المنظم للقطاع السمعي البصري

28/03/2024 23:30

جثة مجهولة كلاوها الكلاب فالطريق بين العيون وفم الواد دارت استنفار فالجوندارم

28/03/2024 23:00

الفيفا طالبو الصبليون يوضحو لهم تهم الفساد المالي الموجهة للرئيس السابق روبياليس وللمعتقلين فالقضية

28/03/2024 22:35

اشناهي المواد الغذائية الفاسدة اللي تشدات ف15 يوم درمضان؟ 402 طن فيها 106 من التوابل و60 طن من العصير و35 طن من لحليب و34 طن من السكر واتاي

28/03/2024 22:30

لشكر شتت تنسيق المعارضة.. زرب على بنعبد الله وبنكيران وأوزين وعلن رسميا باسم المعارضة على ملتمس الرقابة