هناء ابو علي – كود كازا ///

قالت قناة “i24news” الاسرائيلية باللي غادية ترسل 3 مراسلين باش تغطي زيارة وزير الدفاع الاسرائيلي بيني گانتس للمغرب. القناة الاسرائيلية قالت باللي غادي يوصل الليلة للرباط باش تبدا الزيارة غير المسبوقة غدا.

طبعا هادي غير قناة وحدة. يعني السيد جايب معاه صحافيين كثار يشوفو خدمتو. ايلى بغينا كاع لخبارات على بلادنا اذن خاصنا نتبعو الصحافة الاسرائيلية.

حنا فالمغرب ما فراسنا والو. حتى صحافي ما مدعو حتى للندوة الصحافية. حقاش وزارة الخارجية اللي شادها ناصر بوريطة ما فيدهاش فهاد الشي. جابو ناس فالتواصل ومع ذلك غاديين للاور.

علاقة بوريطة المرضية مع صورتو خسرات كلشي. هو يبغي يكون مضوي لبلاد.

حسب الصحافة الاسرائيلية فگانتس غادي يتلاقى مع عبد اللطيف لوديي، الوزير المنتدب المكلف بإدارة الدفاع الوطني بالمغرب وغادي يوقع معاه اتفاقية تعاون في مجال الدفاع.

وقالت باللي المغرب شرى سيستام “SKYLOCK” المضاد للطائرات بدون طيار، الذي تصنعه شركة “Skylock Systems”، وهي جزء من مجموعة “Avnon” الإسرائيلية بهدف تطوير قدراته في حماية المنشآت الحيوية والحساسة، والمدنية والعسكرية.

طبعا إسرائيل والمغرب خدامين دابا على مشروع لتصنيع طائرات “كاميكازي” بدون طيار في المغرب، وتعتبر إسرائيل أحد المصدرين الرئيسيين للطائرات بدون طيار، وتملك شركة صناعات الفضاء الإسرائيلية (IAI) أكثر من 50 عميلا تشغيليا حول العالم.