الدار البيضاء و م ع///

واش ممكن تكون سياحة فكازا؟ هاد الشي اللي جات على قبالو وزيرة السياحة والصناعات التقليدية والاقتصاد الاجتماعي والتضامني، فاطمة الزهراء عمور، فلقاء دار فكازا وسماتو “خارطة الطريق الاستراتيجية لقطاع السياحة برسم الفترة الممتدة ما بين 2023 و2026″.

لوزيرة كتقول ممكن. وقالت بالللي تموقع الجهة على أربع سلاسل سياحية مهمة، وهي سياحة المدن City Break، وسياحة الأعمال، والمدارات الثقافية والسياحة الشاطئية، والتي تعتبر أساسية في تنمية السياحة الداخلية.

وكتحلم ب”تجربة سياحية مثالية” ولكن شرط. خاص “ضرورة تعبئة جميع الأطراف المعنية”. هنا المشكل لكبير. باش تكون “سيتي بريك” “سياحة الاعمال” والسياحة الساحلية” خاص مسؤولين فالمستوى.

رئيس الكونفدرالية الوطنية للسياحة ورئيس المجلس الوطني للسياحة غاديين يقولو ليها راه ممكن. بجوجهم كيقلبو علي مصالحهم ومصالح الشركات اللي كمثلوها او كيملكوها. ما مسوقينش لا لكازا لا لغيرها.

لكن مشكلة كازا الاساسية هي الوالي سعيد احميدوش. والي جهة الدار البيضاء سطات غايب ما حاضرش. ما مسوقش للمدينة اللي هي قلب المغرب النابض.

كيتسنى فبلاصتو حتى يمشي وصافي. جابو صاحبو وولد بلادو وزير الداخلية وراه كيتسنى يسالي سربيسو واخا ما سالاش على خير مع قتل نورا الرجاوية نهار السبت فمركب محمد الخامس فكازا

اذن ما يمكنش تكون سياحة مع عقلية بحال حميدوش. ما يمكنش تكون سياحة مع منع حفلات بحال اللي وقع مع بوبا. باراكا من لكذوب