16/04/2024 20:30
البي بي اس حتى هو مامفاكش قبل اجتماع رؤساء الفرق مع الطالبي العلمي.. قيادي لـ”كود”: مغاديش نتنازلو على منصب النائب السادس لرئيس مجلس النواب
كود هناء ابو علي ///
قدمت منية بوستة كاتبة الدولة لدى وزير الخارجية والتعاون المكلفة بالتعاون البارح الاثنين معطيات على لمرا فهاد الوزارة. بالضبط حضور المرأة الديبلوماسية فالعشرية الاخيرة. واوضحت انه كاينة 35 بالمائة ديال لعيالات فالديبلوماسية المغربية فيهم 466 اطار فالادارة المركزية و559 فمناصب فالخارج و18 مرا سفيرة وقنصلة عامة و4 نساء مديرات و11 مديرة قسم و64 مديرة مصلحة اي المجموع هو 1025 مرا.
دابا هاد الارقام مهمة واخا قليلة. خاص تعيين سفيرات اكثر. لكن قدام وزير الخارجية والتعاون ناصر بوريطة فرصة يدخل للتاريخ ايلى بغى. هي يعين مرا فالمنصب الكتابة العامة للوزارة. هاد لبلاصة خاوية من نهار مشى الازرق سفير للمغرب فتركيا.
لخبار اللي كيدور باللي باغي يعين شي سفير ما فيدوش بزاف فهاد المنصب غادية ضرو هو اكثر. هاد السيد المقترح عندو خوه ضاسر ومتحكم فكلشي الموظفين فقنصلية الخزيرات واخا هاد الاخ غير متعاون ماشي =اجون لوكال= ماشي ولد الخارجية. هادي فضيحة هدرنا عليها وغادين نرجعو ليها مستقبلا.
المهم خاص وزارة الخارجية تجيها مرا فالكتابة العامة. هادي هي بداية المناصفة اللي كيقولها رئيس الدولة الملك محمد السادس الا ايلى كانت هاد الوزارة باغية تكون ضد هاد الخطاب. هادا كلام اخر
