كود احمد الطيب وعمر المزين /////
نايضة ف”ميدي 1 تي في” على الخوا الخاوي. قاليك اسيدي الصحافية سمية الدغوغي مقدمة النشرة المسائية ورئيسة التحرير قالت يوم السبت “الصحراء الغربية” في نشرة الاخبار. اييه.
ناضت القيامة حقاش اعتبرو هاد الشي خطأ جسيم. واش هاد الشي خطآ جسيم اعباد الله. علاش كتضحكو علينا بنادم. راه الصحراء الغربية اسم جغرافي وحزب سياسي بحال البام صرح بهاد الاسم وصافي خاصنا ندوزو لمرحلة اولى. الصحراء المغربية اسم سياسي هو اللي خاص الصحافي ما يقولوش. ساهلة اي صحافي يقول “الصحراء الغربية في الجنوب المغربي” وسدات مادام. راه جميع خرائط الدنيا فيها غير اسم “الصحراء الغربية”.
دابا على هاد الشي باغيين تحاكمو الناس وتحاكمو مهنيتهم. الدغوغي عندها تجربة وكانت ف”دوزيم” السؤال واش عطات شي اضافة للقناة ولا للا ماشي كلشي يضرب فيها على خطآ غبي بزاف.
حنا ف”كود” كنقولو ديما الصحراء الغربية وصحف مغربية اخرى كتقولها. نعتبرها “صحراء غربية” في الجنوب المغربي وسدات مدام. دابا شي باغي يسب خيار وشي كيحن لعهد العزوزي. واش تصطيتو كيفاش هاد الشي راه ما خطأ ما والو
