هناء ابو علي كازا ////
هاد ابن عرفة غير كيركع. واش هادا بصاح طبيب نفساني وامين عام سابق ل”العدالة والتنمية” ورئيس حكومة المملكة المغربية دابا. السيد دارها قد راسو. سكت دهرا ونطق كذبا وقولب لمغاربة. كتب فتدوينة ديالو باللي عناصر الامن شدات مرتكبي جريمة القتل بمراكش. السيد ما كانش عندو شك. الخبر مؤكد “تكمنت عناصرالامن من القاء القبض على مرتكبي جريمة القتل بمراكش”. وحقاش هو الرجل الثاني فهرم الدولة دستوريا راه واخا يكتبو باحتمال٬ المواطنين كيعتابروه خبر مؤكد لا يحتمل الكذب.
بعد شوية دار تدوينة اخرى ماشي تنسخ الاولى واللا تكذبها. كتب “في اتصال مباشرة مع المسؤولين تبين ان البحث لا يزال جاريا مع منفذي الهجوم وان من حقق معهم لحد الساعة لا صلة لهم به”. وزادها بهاديك العبارة ديال الدعاء بحفظ المغرب. يحفظو الله ايلى كانوا بحالك يديرو خدمتهم وما غاديش يحفظو الله ايلى كيسيروه مسؤولين كيؤكدو خبر وينفيوه. هادي مؤسسة اسمها رئاسة الحكومة. نحمد الله ف”كود” من نهار وصلني وحنا كنقولو راها كبر منك. مع الوقت كيبين الاحداث باللي ما تجنيناش عليك. انت للي تجنيتي على المغاربة.
الغريب ان هاد ابن عرفة صاحب الابتسامة الغريبة ما اعتذرش وكأن شيئا لم يكن. غير تبين ان اللي تشدو لا صلة لهم بالعملية. هاكاوا على ابن عرفة. هادوك اللي خططو يجيبوك اللي دارو هاد الجرم فالمغاربة. نستحاقو رئيس حكومة احسن وانت غير بقى تشارك فهادك الشي ديال الندوات بحال اللي درتي فكازا هادي اسبوع
