محمود الركيبي -كود- العيون//

كتعرف إدارة فوسبوكراع فجهة العيون على وقع فوضى كبيرة كيعاني منها كاع العاملين والمقاولين والمرتفقين، لي ماكيلقاو شكون يتصنت ليهم وللا يهضر معاهم بسبب البيبان المسدودة من فترة جائحة كورونا، لدرجة تحيدو لبلايك من فوق الإدارات بشكل كلي.

استغلال أزمة كورونا..

منذ فترة جائحة كورونا لي ضربات العالم كامل وكيحاول يخرج منها، مازالت إدارة فوسبوكراع سادة البيبان ديالها، وممنوع أي مواطن يدخل لمؤسسة مواطنة وحتى العمال والمقاولين كيلقاو صعوبة فالتواصل مع الإداريين ديالها، وأكثر من ذلك، فالشركة سرحات المستخدمين ديالها (ماخدامينش وكيتخلصو) وهو ما كيعتبروه الكثيرون نوع من التشجيع على الريع.

مشاريع ملكية متعثرة..

كتعيش المشاريع لي دشنها الملك محمد السادس، خلال زيارتو لمدينة العيون بحضور الرئيس المدير العام مصطفى التراب، على وقع التعثر الكبير وكاين من المشاريع لي ماكملاتش أصلا، وزيد على ذلك المشاريع لي تصرفات عليها الزبابل ديال لفلوس وباقية فيها الخدمة بوتيرة متعطلة بالزاااف.

مطالب بتدخل التراب

طالب عدد من السكان عبر “كود”، من المدير العام لشركة فوسبوكراع مصطفى التراب التدخل بشكل عاجل باش يوقف هاد المهزلة لي كتشوه صورة الاستثمار بحاضرة الأقاليم الجنوبية، علما بأن منجم فوسبوكراع يعتبر من المناجم النشيطة بالمملكة ولي كيعطيها المدير العام ولكافة  الخدامين فيها أولوية كبيرة، وموفر للمسؤولين ديالها بشركة ومؤسسة فوسبوكراع جميع شروط الراحة فالخدمة.