كود اسماء غربي ///

اليوم خرجات علينا وزارة الداخلية ببيان غريب. فيه انو تم اعفاء عامل عمالة مقاطعات انفا رشيد عفيرات وبررت هاد الاعفاء ب”سوء تدبيره لملف المحافظة على التراث التاريخي والمعماري بمدينة الدار البيضاء “. وباراكا من لكذوب. بغيتو تقولو انو تم اعفاؤو بسباب هو هدم ڤيلا موفيليي اللي كانت فتقاطع شارعي الزرقطوني وانفا بالدار البيضاء هادي شهر بالضبط.

هادي ما شاداش. علاش حقاش التعمير التابع للعمالة عندو رأي استشاري فقط واللي كيتكلف بهاد الشي هو مدير الوكالة الحضرية ديال كازا. حنا كنعرفو بان هاد الوكالة الحضرية بوحدها فالمغرب اللي ما تابعاش لوزارة السكنى والتعمير بل لوزارة الداخلية ومديرها عامل.

ثم كاين سؤال اخر واش هاد الڤيلا اللي تراث ديال بيضاوة كانت مسجلة فقوائم المباني اللي خاص المحافظة عليهم ولا اللا.

حاجة اخرى كتضرب هاد الفرضية هو ان اللي كيدافع على التراث ماشي وزارة الداخلية بل وزارة الثقافة. الداخلية براسها دارت جريمة فحق كازا من خلال هدم مباني كثيرة اخرها الڤيلا اللي كان يقيم فيها المقيم الفرنسي العام زمن الحماية بورنازيل. فبلاصة هاد الفيلا دار المسرح البلدي الجديد كيف كيشرح ل”كود” خبير فالتعمير. علاش ما تفتح لا تحقيق لا سيد زكري

اذن اشنا هي الحاجة اللي وقعات هادي يومين فهاد المنطقة واللي غادية تكون سباب فهاد الاعفاء؟ كلنا شفنا الفيديوات ديال رجال السلطة خرجو يطبقو القانون على مطاعم ملايرية كازا فعين الدياب والعنق.

هاد الشي كان ليلة السبت. ملايرية دايرين ما بغاو. لا احترام للتباعد لا احترام للكمامات بالنسبة للعاملين وفتح بيران واخا ممنوعين…..هاد لملايرية ما رضاوش يسد ليهم 48 ساعة وعوض الداخلية دافع على ولادها جات الضربة لواحد منهم. هادا هو اللي مرجح لاعفاء العامل

دابا هاد العامل غادي يكون فرحان٬ ايلى كان المبرر اللي قلناه٬ حقاش ما مشاش بمخالفة بل بشرف. شوية ساذح اعتاقد انو خاصو يطبق القانون علي كلشي وما عرفش باللي فالمغرب كاينين شي وحدين اسمهم برادة ولعلج وغيرهم فوق القانون وقادرين يتحركو باش يعاقبو عامل.

دابا الداخلية خاصها تكون عندها الجرأة وتقول الحقيقة وخاص هادوك المطاعم المعروفة ديال لملايرية دار ليها مراقبة.

العامل ايلى عندو شي زهر يدخل رئيس الدولة ويحميه ايلى كان السبب هو اغلاق مطاعم لملايرية اما ديك التراث ووو راه غير الخريف.