كود سبور//

مازال الرجاء البيضاوي والمغرب التطواني ما عرفينش دابا بالضبط واش الماتش غادي بتلعب ولا لا.

الهضرة كثرات على هاد الماتش على بعد ساعات قليلة من انطلاقته، وحتى واحد ما عارف واش كوفيرمي ولا غادي يتأجل.

مصادر مطلعة، أكدت باللي عامل عمالة تطوان ما وافقش على إجراء المباراة، بسبب تسجيل حالتين لكورونا في صفوف المغرب التطواني، وبالتالي ما بغاش يتحمل حتى مسؤولية، وقرر يترك الصلاحية لوزارة الصحة هي اللي تقرر.

أما الحامعة، فبالنسبة ليها الماتش مازال ملعوب، لحقاش ما توصلات حتى بشي قرار من عمالة تطوان.

مصدر جامعي مسؤول، أكد ل”كود” أن الجامعة مازال الماتش مبرمج في وقتو، مادام ما توصلات حتى بشي قرار، لهذا لا يمكن الحديث عن تأجيل المباراة.

السلطة المحلية مازال مترددة والفريقين بجوج ما عرفينش شنو يديرو، هادشي واقع للأسف في بطولة احترافية.