16/04/2024 13:15
شبهة التلاعب فالصفقات العمومية بولاية جهة فاس.. حماة المال العام: خاص حجز ممتلكات المشتبه فيهم وإجراء بحث اجتماعي عليهم وتحريك مسطرة غسل الأموال
كود علي الصافي العيون ///
واش قنصلية اماراتية فالعيون مزيانة للمغرب؟ بعد ما هدرنا على النصر المغربي فهاد القضية واللي اكيد تصدمات فيها الجزائر اكثر من البوليساريو حقاش عند هاد الدولة علاقة مزيانة مع الامارات ومن بعد الهدرة على النصر المعنوي لقرار بحال هادا٫ كاينة امور اخرى كتخلي الواحد يخمم فهاد القرار
يقدر تكون الامارات دارتها او دارها رجل الامارات القوي محمد بن زايد كنوع من بداية اعادة العلاقات المغربية الاماراتية كيف كانت فالسابق. هاد بن زايد راه كيعرف مزيان محمد السادس وعندهم علاقة عائلية كاع. ترباو مجموعين وكيتعارفو وهما باقيين صغار.
لكن محمد بن زايد ايام باه الشيخ زايد ماشي هو محمد بن زايد اليوم. مشات ديك ليام اللي كانو الاماراتيين كيحلمو تكون عندهم مدينة بحال الدار البيضاء. هاداك الشي كان نهاية الستينات وبداية السبعينات. مشات ليام اللي كان الجيش ورجالات حراسة الشيخ زايد من المغرب.
دابا محمد بن زايد خلق امارات جديدة. خدا مواقف كثيرة كان ضدها المغرب. الرباط وابو ظبي عندهم خلافات كثيرة من الحرب فاليمن اللي بداتها الرباط ونساحبات منها ومرورا مع التعاطي مع الاسلام السياسي او تنظيم الاخوان العالمي. الامارات دارت كلشي باش ما تبقاش حكومة اسلامية فالمغرب. شوفو غير اش دارو مع الياس العماري اللي كان امين عام البام باش يربح ليهم البي جي دي وفشل.
فملف ليبيا هاد الدولة ما عمرها دعمات لا لقاءات الصخيرات ولا لقاءات بوزنيقة. كتدعم الجينرال حفتر ضد حكومة السراج اللي كتدعمها تركيا وقطر.
كاين ملفات اخرى المغرب كيلقى راسو فمواجهة الامارات. فمواجهة دولة عندها صناديق سيادية وعندها امكانيات كثيرة بزاف.
المغرب فالصحرا اختار استراتيجية فالبداية ديال قنصليات بلدان افريقية. اختيار منطقي. من نهار رجع للاتحاد الافريقي خاصو يعزل البوليساريو اللي عضو فهاد الاتحاد. خاصو يعزل الجزائر وجنوب افريقيا اكبر داعمي البوليساريو.
خدم وجاب دول افريقية تفتح قنصليات فالعيون والداخلة. هاد القنصليات يقدر ما كدير والو ولكن سياسيا راه مزيانة للمغرب. اقرار بالسيادة المغربية على هاد المنطقة. جاب دول كيعرفها. يقدر كاع المقرات تتكلف بيهم الدولة. يعني المغرب محكم فالعملية مزيان وسياسيا رابح منها
دابا كيفاش غادي يدير مع الامارات اللي غاديين يفتحو قنصليتها لاربعا الجاية =4 نونبر=٬ اولا الامارات دولة لاباس عليها. غادية تكري مقر بنفسها ما محتاجة لحد. فهاد المقر المغرب ما يقدر يعرف والو. دولة عندها اطماع فموريتانيا وفمالي تقدر تلقى العيون مناسبة ليها بزاف وتخدمها باش تحقق هاد الاطماع.
غدا ايلى كان شي اجهزة متطورة فهاد القنصلية واش المغرب غادي يقدر يدير شي حاجة
هاد الشي فرضيات. ولكن مع دولة لاباش عليها المعطيات غادية تغير.
يعني هاد القنصلية فهاد الوقت تقدر ترجع للمغرب ببومزوي.
