كود الرباط//

علمت “كود” من مصدر مطلع أن حسني الغزاوي، اللي عينو الملك محمد السادس، يوم الجمعة 19 ماي الجاري، رئيسا للإدارة الجماعية لمجموعة التهيئة العمران، بدا بمراجعة شاملة للملفات اللي كانت كاتشم فيها روائح “الفساد” المالي والإداري فعهد الرئيس السابق بدر الكانوني.

وحسب مصدر “كود”، لا حديث وسط أطر الإدارة الجماعية لمجموعة تهيئة العمراني، سوى على تصفية تركة الكانوني للي فشل في مهمة تدبير العمران باعتراف المسؤولين الحكوميين وبشهادة التقارير الرسمية (خصوصا تقارير المجلس الأعلى للحسابات).

وأفاد ذات المصدر بلي عدد من المسؤولين خصوصا لي جابهم الكانوني، مخلوعين يتفتحو ملفات الصفقات اللي دارو بالأخص مارشيات بون دوكومند اللي عليها شبهات كثيرة، إضافة إلى تدبير التكوينات والاستفادة من لوطيلات بدون سند قانوني والسفريات الكثيرة.

وكشف مصدر “كود” بلي واحد من أذرع الكانوني فإدارة العمران، يوجد ضمن اللائحة السوداء للرئيس الجديد، ويتعلق الأمر بسعيد مسال، نائب الكانوني.

مسال كان مع الكانوني فلوزين ديال تكستيل قبل ما يتعين الكانوني فإدارة العمران ويجيبو معه. مسال كان كونطر متر ودبا كيتحكم فالعمران.

كاين لي كيوصفو بالمدير الحقيقي، وكاين اللي كيقول بلي سالات وقتو مع الرئيس الجديد الغزاوي لي عندو  دبلوم مهندس دولة في الهندسة المدنية من المدرسة المحمدية للمهندسين بالرباط.

الغزاوي لقا إرث خايب، تلاعبات فالسكن واختلاسات مالية وفوضى وريع فالصفقات. واش يقدر على الحيثان ويتحالف مع الوزيرة المنصوري اللي ديما كتشكا من هاد الشركة اللي ولات عبء على الدولة؟.

وراكم الغزاوي، الحاصل على ماستر في إدارة الأعمال وماستر مدرب خبير، تجربة كبيرة في مجال التدبير المقاولاتي والتهيئة الحضرية، من خلال مختلف مناصب المسؤولية التي تقلدها داخل عدة مقاولات.

الغزاوي كان كذلك مدير للهندسة مكلفا باستراتيجية التنمية والهندسة المالية وهندسة الاستغلال وأنظمة الإعلام، ومدير للشؤون الإدارية والمالية، مكلف بالشؤون المالية والموارد البشرية والأسواق والشؤون القانونية والوسائل العامة فالشركة الوطنية للطرق السيارة بالمغرب. هاد التجربة كاملة واش تخليه يحارب حيثان الفساد فهاد المؤسسة ولا غايدير كيف دارو لي سبقوه؟