كود هناء ابو علي ///
التوجاد للحكومة مستمر. اجتماعات يومية كيف قال قيادي استقلالي٬ بين عزيز اخنوش رئيس الحكومة المكلف بتشكيلها مع عبد اللطيف وهبي امين عام التراكتور ونزار بركة امين عام حزب الاستقلال. القيادي قال ل”كود” باللي بعض المرات كيجتامعو جوجت المرات فالنهار. بهاد الايقاع كلشي وجد حتى قبل ما يقرر لا المجلس الوطني للبام ولا المجلس الوطني للاستقلال فقضية المشاركة فالحكومة من عدمها. الاجتماعات بجوج غادية تكون غدا.
لكن المثير فهاد التحالف الحكومي هو انو هجين. تحالف ضد على الاقل الحملة الانتخابية الاخيرة. تحالف ضد ما صوت عليه المغاربة. لمغاربة صوتو على حزب الاحرار وعطاوه المرتبة الاولى واخا خصص ليه امين عام البام حيز كبير من الحملة للهجوم عليه.
جوجت الاحزاب ركزات على الهجوم الشخصي على اخنوش والتهكم عليه سبو هما البام عبر وهبي والبي جي دي عبر كافة قياداتو.
وجد هاد الحزب تحالف مع البي جي دي ومع احزاب اخرى الا الاستقلال والاحرار والاتحاد. اختار الجهة ديالو. دخولو للحكومة اهانة للي صوتو على الاحرار واهانة للمغاربة.
حزب الاستقلال خاصو يعرف حجمو. مطالبتو بابعاد الاتحاد الاشتراكي محاولة منو للتحكم فالحكومة المقبلة. عارف هاد الحزب ان دخول الاتحاد غادي يخليه يعرف حجمو. عايق بقوالبو.
الحزب الوحيد اللي منطقيا خاصو يكون فالحكومة مع الاحرار هو حزب الاتحاد الاشتراكي. علاش؟ لان هاد الحزب دافع على الاحرار. دعمو فالوقت اللي كانت كاع الاحزاب تقريبا كتهاجمو. رد ليه الجميل باش اشتارط اخنوش على بنكيران فاللول وبنعرفة فالثاني دخول الوردة كشرط لدخول الحمامة للحكومة المنتهية ولايتها.
الاتحاد الاشتراكي هو الحزب الوحيد الصادق مع الاحرار. الباقي غير كيناوعرو بما فيهم الاستقلال. اييه ما وقعش بيانات ضد الاحرار ولكن دار تلميحات ضد اخنوش. بلا ما نهدرو على برنامجو الانتخابي فشقو الاقتصادي اللي على النقيض من برنامج الاحرار.
ايلى ما دخلش الاتحاد للحكومة راه الخاسر الاكبر هو عزيز اخنوش ماشي ادريس لشكر. الرابح الاكبر هو البام وشكون كيحركو فالخفاء هادوك اللي اسسوه حتى ولى “وافد جديد”. هو الاستقلال وحمدي ولد الرشيد اللي كيحرك هاد نزار عن بعد من العيون
