كريم الشركي-كود///

بعد ما يقارب سبع سنين على وفاة الشابين أمين و بيسلي في السواحل المغربية، تمكن والديهم من الفوز جزئيا فالنعركة اللي داروها ضد البحرية المغربية.

حكاية وفاة أمين وبيسلي كيف كانت متبعاها كود، وقعات في أواخر سنة 2013، بعدما كانوا كيحاولوا يهربو لحشيش في زودياك خرجات من سواحل المغرب، وبعدما شدهوم الرادار تبعهوم قارب ديال البحرية، وملي هربو منو لاحقهوم حتى دخل فالزودياك ديالهوم وقسمها على جوج وماتوا الدراري.

والدين أمسن وبيسلي، كيقولوا أن البحرية قتلات ليهم ولادهوم عمدا، وانها كان ممكن تحاصرهوم بدون ما تدخل فالقارب، وهادشي قتل متعمد، وحاولوا يطلبوا من المغرب والبحرية المغرب، تقدم أعضاء البحرية الملكية الثلاثة للمحاكمة، لكن هادشي ما وصلهوم حتى لحاجة.

كما أن جميع الوعود المقدمة لهم من الحكومات الاسبانية المتعاقبة، ومن وزراء الخارجية والداخلية الاسبان، كانت غير وعود كاذبة، حتى جا القاضي خوسيه لويس كالاما اللي قبل أنه يفتح تحقيق فهاد القضية، هاد التحقيق أفضى لاقتناعه بمقتل الدراري بجوج اللي هوما من السكان الاصليين ديال مليلية، وعليه قرر الأمر باعتقال ثلاثة من جنود البحرية الملكية المغربية.

هاد الأمر يقدر يخلق أزمة جديدة بين المغرب وإسبانيا، لأن أمر الاعتقال كيتعلق بثلاثة من أعضاء الجيش المغربي، والقضاء الاسباني عندو سوابق فهادشي، بعدما كان أمر باعتقال جنرالات مغاربة فالسابق بسباب دعاوي أعضاء من البوليساريو.