كود – عن “هاآرتس”//
موقع “هاآرتس” الإسرائيلي، كشف اليوم الثلاثاء، ان إسرائيل باعت للمغرب طائرات مسيرة انتحارية ساوية 22 مليون دولار، شداتها الصناعات الجوية الإسرائيلية، وهادشي ف اطار انضمامو لاتفاقات أبراهام.
كتقول التقارير ان إسرائيل باعت لينا درونات كاميكاز من نوع “هاروب” ، اللي ديجا باعته لأذربيجان، العام اللي فات، ف النزاع بينها وبين أرمينيا.
وحسب “هاآرتس”، هاد النوع من الدرونات، اللي كيتستعمل ف إسرائيل والهند وأذربيجان، يمكن يهز حتى لـ20 كيلو من المتفجرات، وقادر يطير 7 ساعات، ويوصل لمسافة 1000 كيلومتر.
وبينات التقارير المالية، اللي خرجات السيمانة اللي فاتت ان الصناعات الجوية الإسرائيلية باعت ف الربع الثاني من هاد العام للمغرب، درونات بـ 12 مليون دولار، و10 مليون دولار اخرى ف الربع الثالث من هاد العام.
وقالت مصادر للموقع الإسرائيلي ان هادي اتفاقيات جديدة مع المغرب.
للتذكير، السيمانة الفايتة ، وزير الامن الاسرائيلي بيني گانتس دار زيارة رسمية لبلادنا. مشى ترحم على الحسن الثاني ومحمد الخامس، وعقد اجتماع مغلق ف الرباط، مع نظيرو المغربي، عبد اللطيف لوديي ووقعو مذكرة تفاهم أمنية، ومن بعد تلاقى بقائد الاركان المسلحة المغربية بلخير الفاروق، وبوزير الخارجية ناصر بوريطة وكبار المسؤولين الامنيين ف المغرب.
