كود علي الصافي العيون ///

المائدة المستديرة ديال مباحثات جنيف على الصحراء اللي جمعات قبل ايام المغرب والبوليساريو والجزائر وموريتانيا تقدر تكون بداية لحل ملف عمر 40 عام. الشهادات اللي جابت “كود” من العيون عاصمة المدن الصحراوية فالجنوب المغربي كلها غادية فهاد الاتجاه “بحال ايلى شي هواء زوين دخل. غير الاحساس باللي ممكن يكون حل دخل الفرحة على ناس الصحرا” يقول احد الصحراويين ل”كود”.

لكن داخل المائدة المستديرة اللي دامت يومين كيفاش كانت اجواء اول يوم؟ “كود” جابت ليكم تفاصيل حصرية. الوفد المغربي دخل قبل وفد البوليساريو. كلشي كان كيتسنى كيفاش غاديين يتصرفو قادة البوليساريو الصحراويين الانفصاليين مع الصحراويين الوحدويين ممثلين فحمدي ولد الرشيد رئيس جهة العيون الساقية الحمرا والخطاط ينجى رئيس جهة الداخلة وادي الذهب٬ خاصة ان حمدي ولد الرشيد وخداد =البوليساريو= ولاد العم حقاش بجوج من ركيب الساحل٬ عندهم جد واحد. اما الخطاط ينجي فكان عايش معاهم قبل ما يقرر يدخل للمغرب

وفق مصدر “كود” فان وفد البوليساريو كان مؤدب فحدود دخل وسلم وبرك. يعني ما كانش السلام بالتعناق بيناتهم. الغريب وفق مصدر ديبلوماسي ل”كود” من نواكشوط ان “اللي تعانق هو وزير خارجية المغرب ناصر بوريطة ووزير خارجية الجزائر مساهل.

البوليساريو كانو محرجين بزاف واخا رددو جزء كبير من اسطواتهم حول الاستقلال ووو لكن ردو بالهم حقاش ما عندهم صفة تمثيل “الشعب الصحراوي” كيف كيقولو ديما.

يبدو ان هاد المفاوضات كانت باش كلشي يفرغ لمزيودة ديالو. يقول اش بغى. الاستقلال للبوليساريو والحكم الذاتي للمغرب. دابا خاص اش غادية تربح موريتانيا وبالاخص الجزائر.

وفق مصدر “كود” فان الجزائر دعت علي حل شمولي. اي باغية حقها من هاد الشي. اتحاد المغرب العربي ما يمكنش يكون بلا حل هاد المشكل. هاد الاتحاد غادي ينفع كلشي كلشي.

هادي بدية مزيانة تقدر تحرك شوية هاد الشي اللي فالصحرا