سهام البارودي – كود//

واش شفتو التصاور ديال عباد الله لي خرجوا البارح الجمعة فنيوزيلاندا باش يعلنو على التضامن ديالهم مع المسلمين ؟
واش شفتو هادوك لي كاتقولو عليهم ” كفار” كي خارجين يتضامنو معاكم و مع خوتكم ! عيالات رجال ! دراري صغار ! حتى من رئيسة الوزراء ديالهم خرجات مرة و جوج و عطات تصريحات لوسائل الاعلام ؟
شفتوهم ؟ شفتو التصاور مزيان ؟ شفتو عباد الله شحال نقيين فدماغهم ؟ شحال مسالمين ؟ شحال كايقدسو الحياة و الانسان ؟ شحال كايعطيو قيمة لبني آدم؟ شفتو الناس كي دايرين؟

وا الخوامجي ؟ وا داك بولحية لي كارع لينا الفر بالتولويل و الغوات فالفايسبوك بنظرية المؤامرة و ” شوفو الغرب شنو كايديرو فخوتنا ” و غير وقعات الحادثة خرجتي كاتگرع علينا الكراهية ديالك و الظلامية ديالك فوسائل التواصل الاجتماعي ! فين غبرتي دابا ؟ ياك كنتي كاتبكي حيت ” دماء المسلمين رخيصة” و ” الغرب لن يتضامن مع المسلمين” و ” لن ترضى عنك اليهود و لا النصارى …” و ديك الهضرة الغليضة !

فينك دابا ؟ مابنتيش ليا خرجي فالفايسبوك كاتعلق على تصاور عباد الله لي خرجو البارح فنيوزيلاندا للتضامن مع ضحايا الحادث الارهابي ؟ و لا صافي ماصدقاتش ليك التمثيلية ! خسروها ليك فاش خرجو البارح !

و آجي بعدا ! نتا نتا لي عزيز عليك تلعب دور الضحية ! فين عمرك خرجتي نددتي بجرائم داعش ! فين عمرك خرجتي نددتي بالاحداث الارهابية لي ماتو فيها ابرياء و لي كانو سبابها مسلمين ارتاكبوها باسم الاسلام ! علاش ماشفناكش خارج تعلن التضامن ديالك مع ضحايا الباطاكلون مثلا! و لا ضحايا مدريد ! و لا ضحايا نيس لي طحنهم ارهابي مسلم بكاميو ؟ فين عمرك هزيتي ولادك و ديك المغمومة د مرتك و شي بوكي د الورد و لا قبطة د المعدنوس هي اللخرة و شفناك داخل لكنيسة تتضامن مع الاقباط و المسيحيين لي كايشتتو ليهم الارهابيين الكسدة فمصر و الفيليبين و باكستان ؟

و كون غير كنتي ماكاضامنش و كاتسد زكك ! لا كاتزيد تكملها و تجملها و تضحك على هادوك لي ضامنو مع الضحايا ! و تستهزا بيهم و كاتحرض عليهم ( وليدات ماما فرانسا ! أذناب المستعمر ! أين تضامنكم مع اخواننا في بورما ؟…) ! و حدك كاتبقا تگمگم علينا ” لا يمثلون الاسلام” ! وا بين لينا نتا لي عند بالك كاتمثل الاسلام شنو هوا الاسلام ! خرح بلحيتك و بفوقيتك و بالسواك لاصق ليك فضراسك غوت و اعلن التضامن ديالك مع ضحايا الباطاكلون ! و لا لا ؟ هادوك غير ” كفار” ياك ؟ قتلوهم بلعاني ! ” داكشي موراه المخابرات” ” الماسونية ” ” ليهود ”  ! باش يلصقوها ف” المسلمين” باش يحاربو ” الاسلام” ! حيت هادي هي الهضرة لي كاتخرا علينا فوقما كاتوقع شي مجزرة و لا شي تفرگيعة باسم الاسلام فشي قنت.

البارح نيوزيلاندا عطات درس ! عطات درس للعالم كامل فالانسانية ! و خصوصا للمتأسلمين لي فخاطرهم كايشجعو على الارهاب و باغينو يكون حيت فخاطرهم كايآمنو بلي هوما احسن من عباد الله كاملين ( حيت هوما مسلمين و لخرين كفار) !
البارح نيوزيلاندا عطات درس لبوزبال ! لي كايبغي يلعب دور الضحية المحگورة و هوا أصل الشر فالعالم ! كاينشر الإقصاء و الظلامية و كايحارب الحريات و الفن و الابداع و الجمال !

ايوا الله ينعل لي مايحشم ! و الله يمسخكم يا الثعالب قد ما صبات و سحات !