سهام البارودي – كود//
دابا مع هاد الفورة ديال وسائل التواصل الاجتماعي و القنوات الالكترونية ! ها نون تيفي ها طيط تيفي ها مبروكة تيفي ! نقدو نقولو انه تمت دمقرطة ” الكلمة” بالعربية تاعرابت وليتي عندك نفس الاحتمال تسمع رأي شي مفكر كبير و خاتر و شارب عقلو ! و لا رأي شي ميخي كايحل دلقوشو بما ليس له به علم.
بجوج ولاو عندهم الحق يهضرو و يعبرو على الرأي ديالهم فمواضيع كبيرة و مهمة ! و بجوج وليتي تقدر تصادفهم فوسائل التواصل الاجتماعي ! و تقدر گاع تصادف داك ميخي اكثر ماتصادف داك لي بعقلو و خاتر حيت ميخي كايكون عندو لافونطاج انه فاش كايهضر كايخرى شي خرية لي كاتخلي الذبان يتجمع عليها و تطلع فالطوندونس!
التحرش الجنسي فالعالم كامل ظاهرة غير صحية، و فالعالم كامل الناس كاتحاربو، سواء كانو عيالات او رجالة ( بعقلهم)، داكشي علاش بنادم قبل مايدوي على التحرش و يشرگ فمو باش يعطي الرأي ديالو من الاحسن يعرف شنو هوا التحرش الجنسي؟ التحرش الجنسي آ سيدي هوا واحد الفعل عدواني اتجاه الآخر كايكون فيه حمولة جنسية ! كايمارسو انسان اتجاه انسان آخر يا إيما باش ينيكو ! و لا باش يخلعو ! و لا باش يبين ليه بلي هوا واعر عليه.
هادشي لي كايوقع فالزنقة فاش شي ميخي كايتبع شي درية و هوا كايعيط ” هاح ! وا كر عندك ! ” ” نجي و لا نشد رجلي” ” كلشي زعر و لا غي الشعر” ” … و لا فاش كايلصق فيها صحة باش تعطيه النمرة و لا باش يوقفها تهضر معاه و لا تطلع معاه فالطوموبيل.
و فالمغرب مع المجتمع ميزوجيني بالفطرة ! التحرش كايخلي الحياة اليومية ديال بزاف د العيالات فالزنقة و فالخدمة جحيم ! شحال من وحدة كاتكون غادية ماعليها مابيها للحمام تاكايلصق فيها شي ميكروب فجنابها خصوصا فالاحياء الشعبية ! شحال من تلميذة فللليسيات و الكوليجات كاتعيش فالرعب ديال التحرش ديال شي مجرم كايعصر ليها فباب الليسي ! شحال من مرأة عاملة كاتعاني من التحرش ديال رب العمل لي مرا يلوح ليها هضرة ! مرة يقيس ليها بزولتها ! مرة يغمزها ! وتجي نتا بكل بساطة فالتفكير و بكل غباء تقوليا ” قانون التحغش غي تخغبيقة”
مؤخرا تفرجت فواحد الاستجواب ديال الممثل رفيق بوبكر لي بان ليا من نهار قال ديك “هادشي كامل واقع و مانضربوش الطاسة” و خلق بيها البوز ولف البوز و يصحاب راسو راه اي موضوع يجي بسم الله يقدر يسطل بسطله فيه! ايكس شمكار خرج لينا مؤخرا بتصريح فشي قناة كايقول ” بلي كاينين العيالات بزاف و لاماتحرشش بيهم الواحد راه ماغايتجوجوش ” و بلي قانون منع ” التحرش غير تخربيقة و تخويرة ” و بلي ” ماكاينش شي ساطات بوگوصات فالمغرب لي الواحد يتحرش بيهم ” ! بريف ماشي شي هضرة جديدة حيت نفس هاد الهضرة غاتسمعها من عند هايش مايش فالزنقة و الطوبيس و القهوة و لكن الطامة الكبرى هي تخرج من دلقوش واحد كايسمي راسو ” فنان” و المصيبة الكحلة هي انه هاد السيد خدام فواحد من الاوساط لي كاتكثر فيهم هاد الظاهرة.
وا تسنط آ بعرور ! دابا هاد المنظمات العالمية و الوطنية و عباد الله فالدول المتقدمة و المشرع المغربي كاملين كايخوغو ( كيما كاينطقها خونا ) و نتا الوحيد ! البطل لي كتاشفتي بلي التحرش حاجة مزيانة و فمصلحة المرا المغربية. و باش زاد كملها و جملها قاليك ماكاين شي ” زين فالمغرب” لي الواحد يتحرش بيه. وا دابا هادي هضرة كاتخرج من دلقوش فنااااان مغربي؟ تا راه كون قلتي هاد الهضرة فشي بلاد كاتحتارم المواطنات ديالها كون وراوك المنظمات الحقوقية وجهك فالمراية.
واخا گاع آ سيموحمد ! بلا ماندخلو فديك الهضرة ديال المغربيات زوينات و لا خايبات و بأي معايير و بشكون نتا ؟ و واش مرتك تاهي دخلتيها مع الخيبوعات ؟….
راه فالمغرب كايغتاصبو تا الحمقات و المتشردات و العيالات لي فايتين تسعين عام ! المعيز و الحمير و الدجاج كايتغتاصب و تجي نتا تقوليا ” ماكاينش شي زين نتحرشو بيه ” !
مزيناتك !
و نمشيو معاك آ سيموحمد فالطرح ديالك و نفرضو انه المغربيات ” ماشي شي زييين ” ! واش هاد القضية كاتعطيك الحق تتحرش بيهم ؟ طبعا لا !
راه من الخطير انه المنابر الاعلامية تبقى تسول اي ماكان على الرأي ديالو فمواضيع كبيرة فحال التعليم بالدارجة و قانون التحرش … رفيق بوبكر راه غا ممثل ! ماشي مفكر و لا فيلسوف و لا شي واحد عندو الخريقة باش يجاوب على هاد للاسئلة الكبيرة عليه.
