كود اسماء غربي ///

مرة اخرى هادوك اللي مكلفين بالتواصل فالقصر الملكي كيرگعو. خبر طلاق الملك محمد السادس والاميرة لالة سلمى اللي كانت نشراتو المجلة الاسبانية “اولا” ما عمر كان ليه شي تآكيد رسمي هنا عندنا. هادي يومين تصريح للمحامي الشهير ديبون موريتي حول ما نشر من اشاعات بخصوص الاميرين ولي العهد مولاي الحسن والاميرة لالة خديجة اللي كتقول باللي مشاو مع امهم وكلام كثير٬ هاد البيان وضح الامور. تصريح نسب فيه المحامي للملك والاميرة كلام منو ان داك الشي غير اشاعات مغرضة وفسرها المحامي بشي جهات عندها اغراض اخرى. وهادوك اللي ضد المغرب راهم غاديين يبقاو ديما كيتكبو ضدو وديما يخلقو القصص. القوة ماشي برا راها فالجبهة الداخلية.

ولي العهد وامو واختو كانو فاليونان فعطلة. ماشي لا هي اللولى ولا الثانية ولا حتى الخامسة. اذن هنا الامور واضحة.

اللي مثير فالبيان هو تقديم لالة سلمى بعبارة “الزوجة السابقة”. طبعا مع احتفاظها بلقبها كاميرة. هاد الشي خرج ف”گالا”. ماشي شي مجلة محترمة شي احترام كبير ففرانسا. ما عندهاش على الاقل الاحترام اللي كاين عند “باري ماتش” اللي مولفين كيخرجو فيها ناس لقصر خباراتهم. رئيس الدولة كان دار حوار فيها فبداية حكمو. تعطاتهم عدة مرات سكوبات.

المهم ان هاد لخبار كيهم لمغاربة. كيهم المغرب. فعمق السياسة. عندناكم تقولو لي اللا بيبول لا الحياة الخاصة. علاش كيهم المغرب ومستقبلو. حقاش فهادك لخبار ديال “گالا” كاين ولي العهد الامير مولاي الحسن. يعني الملك المقبل للمملكة المغربية. كل ما يهمه يهم المغرب.

نقطة اخرى وهي ان الطريقة اللي تم بها زواج الملك بلالة سلمى كان فيها اشراك للشعب. احتفال شعب كامل بزواج ملكو. كان على علم بكلشي. يعني الطلاق كان خاص اخبار الشعب. هادا ملك بنى حكمو على امور كثيرة منها الدفاع عن حقوق النساء. كانت اجراءات كثيرة فهاد الاتجاه. من مدونة الاسر ة حتى المناصفة. الملك محمد السادس من دعاة المساواة فالحقوق بين الرجل والمرأة. شوفو غير التعيينات الاخيرة فالمجلس الوطني لحقوق الانسان. القصر كان اكثر دفاعا على النساء من الاحزاب من البرلمان من رئاسة الحكومة….

اذن علاش هادوك اللي مكلفين بالتواصل ما تواصلوش على الطلاق.

علاش نتسناو جريدة اسبانية تخبرنا وجريدة فرنسية تؤكد لينا وتخبرنا على ولي عهدنا. هاد الشي ما كانش خاصو يكون. حساب رسمي للعائلة الملكية او للديوان الملكي او للملك على وسائل التواصل الاجتماعي دير هاد الخدمة. ماشي ضروري حتى يعطيو لخبار للصحافة المغربية مادام هاداك اللي مكلف بالتواصل فالقصر ما عندوش معاها. غير خاص المغربي اول من يعرف ماشي البراني. وحشومة هاد الشي مازال كيدار