28/04/2024 10:30
تقارير إعلامية إسرائيلية كتتوقع.. رئيس الأركان هرتسي هاليفي كيستعد باش يقدم استقالتو
سهام البارودي – كود//
باش تعرف بلي حتى واحد مابقا باغي يحس بالفقراء و لا يتنسب ليهم و لا يتحسب معاهم فهاد رمضان ! قبايلة وانا غادية من الخدمة للدار درت واحد التمرين على الجمل لي غادي نسمع فالزنقة !
المكان: أحد أحياء الدار البيضاء
الزمان: اول نهار فرمضان 2019
مدة المشي: عشرين دقيقة
فوسط هاد العشرين دقيقة و وسط صداع الطوموبيلات و البياعة و الشرايا سمعت هاد الجمل:
“كانفكر نتطوع مع شي جمعية خيرية و نقري الدراري لي ماعندهمش لي يقرا معاهم فالدار”
“لا آ خويتي ماعنديش مع النقيل ! كانبغي نجيب الامتحانات على دراعي ”
“معلوم آ سي الحاج! الوقت هوا الوقت! لا قلت ليك آجي مع الجوج راه الجوج غاتلقى الورقة ديالك موجودة”
“نقدو ننتجوه فالمغرب و نصدروه لافريقيا و اوروبا گاع”
كانت هادي نبذة من الجمل لي سمعت فالطريق فأول نهار ديال رمضان… فشكل ياك ؟ بيزاغ ؟كاتقول مع راسك اينا كوكب عايشة هاد السيدة؟! معلوم تكون فشكل و بيزاغ حيت ماكايناش و ماسمعتهاش و غير ختارعتها من راسي!
الجمل الحقيقية لي سمعت هي هادي ! وا دابا حل عينيك معايا :
” شريت كيلو ، النص درتو كواري و النص قليتو ”
“ميتين و ربعين ليطرو و و مياوثلاتين نص ايطرو آ الحاجة”
“شي دريهم آ بنيتي”
“قوليه يعطيك ستة ديال الخبزات ثلاتة زرع و ثلاتة محراش”
“بلا عظم آ خويا و دير معاه كورنيشو و زيد رابعة هريسة”
“الله يحن علك”
“عبر كيلو تفاح و نص كيلو من آفوكا”
“قوليه الشعرية غليضة ماشي رقيقة”
“تشعاوني معانا آ خواديرية”
جمل طبعا ماعندها علاقة بشهر الإيمان و لا بتغيير السلوكات نحو سلوكات ايجابية و لا بديك الهضرة ديال الغفران و التسامح و الاخلاق ! جربوها وغاتشوفو بلي الناس كاتهضر فمعظم الاوقات على الماكلة و الشراب و الشهيوات! جربوها و غاتشوفو بلي الثقافة الاستهلاكية البشعة كاتغطي على عقول عباد الله و كاتسيطر عليهم !
حتى واحد كايبان ليا مابقا باغي يحس بالفقراء كيما كانو كايقولو لينا فالمدرسة فاش كايهضرو لينا على المغزى من الصيام ! فزمن البريوات و القنينطات ولينيم و بيتزا تاواحد مابغا باقي يصوم باش يحس بالمزاليط ! الناس كايصومو وي و لكن كايتبرعو فالفطورات لدرجة الانتقام من الجوع و العطش ! حتى دوك الخوانجية صحاب قال و قال كاتلقاه مبارطاجي تصويرة شي طبلة فاعلة تاركة فالفايسبوك، اينا عواصر و اينا بيتزات و اينا حوت مشوي و اينا حريرة و اينا بريوات بليزيبيناغ و كاتب فوق منها ” و إن لنفسك عليك حقا” زعما مادويويش معايا و ماتصدعوش ليا راسي بداكشي ديال الزهد و التواضع و الاحساس بالمزاليط!
و مريوتو ! ديك لي كاتگوليك فاش كاتلاقاي معاها ” زوينة تبارك الله خاصك غا تستري راسك بالنقاب” ماكاتعطلش باش تبارطاجي تصويرة واحد مولاتي البسطيلة متختخة بالعسل و اللوز وجداتها للعشا و الشلايض و العواصر و كاتبة فوق منها ” و إن لأهلك عليك حقا” زعما بلا ماتصدعو ليا راسي بالمزاليط و الاحساس بالمزاليط راه هادشي داخل فال”طيبات من الرزق” خليونا ناكلو ونتمتعو!
كلشي مهلي فراسو ! كولشي فاطر مزيان ! كولشي مصايب الشهيوات ! حتى داك المزلوط لي كايصومو عباد الله باش يحسو بيه راه تا هوا صايم ! و تاهوا كايحس بشي مزلوط ازلط منو ! و كايضرب احسن بلاطو ديال الفطور خرجوه ليه المحسنين فشي درب !
ايوا شكون غايضامن مع المزاليط و يحس بيهم ؟ ملي تا المزاليط براسهم مامضامنينش مع راسهم ؟
