كود احمد الطيب ////

قبل ما يخرج محمد زيان الزعيم السابق للحزب الليبرالي والوزير السابق واحد رجالات المخزن لسنوات٬ ففيديو هادي ايام٬ كانت الصحافة الاسبانية بصفة خاصة كتبات اكثر من موضوع على جولات الملك فالخارج.

كاين رابط بين ما كتبته الصحافة الاسبانية خاصة “ال كونفيدونسيال” ومواضيع الصحافي انگاسيو سمبريرو وما بين فيديو زيان.

زيان كيقول ان الملك ديما خارج وبربط ما عندو معنى قال خاص انتقال للسلطة لولي العهد. زيان كان واعي باللي غير كيخربق ومع ذلك بغى يعطي معنى لكلامو. علاش كيخربق؟ اولا الملك خدام وما عمرو وقف من الخدمة. متبع مع وزراؤو مع رجالاتو الشادة والفادة ماشي بشكل يومي بل كاين اللي كيتاصل بيهم اكثر من مرة فالنهار على مواكبة موضوع يهم الدولة.

علاش نية زيان ما صافياش وهدفو حوايج اخرى؟ هو ان جورنال فرنسي ماشي ضريف ولا مهادن مع المغرب كتب هادي اسبوع كيفاش كيشتاغل الملك محمد السادس هاد ليام. هاد ليام اللي كيتواجد فيها ففرانسا باش يكون قريب لامو لالة لطيفة اللي كتعيش وضع صحي صعيب. كاين الملك وكاينة العائلة كلها تماك لنفس الغرض.

فهاد المقال كيبنو ان الملك كيتبع تفاصيل التفاصيل. كاين مسؤولين كيخدم معاهم بشكل يومي بحال مستشاريه ورجالاتو فالامن الداخلي والخارجي ورئيس الحكومة وكاين اللي كتبع معاهم ملفات بعينها بحال وزراء الصحة والداخلية….

رئيس الدولة كيمارس دورو بشكل كامل. هنا كتبان نية زيان للي ما صافياش. هو قرا هاد الموضوع وعارف الدولة كيفاش تشتاغل انطلاقا من تجربتو لكبيرة مع المخزن وخرج كيغلط الناس.

لو ان زيان عبر على رأيو بلا كذوب بلا تقلاز تحت الجلابة٬ كان غادي يكون من حقو كسياسي كمحامي سابق٬ لكن بنى كلامو على ادعاءات ما عندها لا ساس.

بالنسبة للصحافة الاسبانية او هاد الصحافي بعينو فهادي قضية معروفة. اولا ماشي اول مرة كيدير هاد الشي وثانيا هو واخا كيكتب ما عمرو قال باللي رئيس الدولة ما كيمارسش مهامو بحال الطريقة اللي قالها بيها زيان.

اسلوب الملك محمد السادس ما تغيرش من نهار وصل للحكم ف1999. ما عمرو خدا القصر الملكي فالرباط مثلا٬ مقر لعملو. ديما كيتنقل. كيعين رئيس حكومة فتيفلت واخر فالرباط وثالث فكازا. كيدير مجلس وزاري فالرباط واخر فالعيون… كتلقاه هنا ولهيه. داخل المغرب وخارجو. لكن مصالح الدولة غادية ما عمرها توقفات ما عمرها تعطلات ما عمرها تسببات فشي ازمة.

اذن كلام زيان غير مزايدة ولكلام على اسفارو تخربيق فعالم كيعيش “تيلي تراڤاي”. الفعالية ما كتعنيش مكتب ومقر ووو. النموذج حكم محمد السادس. شوفو التحولات اللي وقعات فالبلاد من نهار وصل. كان الملك فاي بلاصة يتحرك من الشمال للجنوب ومن الشرق للغرب. دار اسلوب مختالف على بوه. اسلوب عطى نتائج كتشوفوها بعينيكم.