الرئيسية > آراء > واش النحس ولا استهتار اللعابة؟.. إنذار على بكري للأسود باش يكَادو اللمسة اللخرة كَدام الشبكة
14/01/2022 20:00 آراء

واش النحس ولا استهتار اللعابة؟.. إنذار على بكري للأسود باش يكَادو اللمسة اللخرة كَدام الشبكة

واش النحس ولا استهتار اللعابة؟.. إنذار على بكري للأسود باش يكَادو اللمسة اللخرة كَدام الشبكة

كود سبور //

المغرب لعب الشوط الثاني تقريبا فمنطقة جزاء منتخب جزر القمر وخرج من الماتش بهدفين فقط.

الإحصائيات الجارفة ومحاولات التسجيل للمنتخب ماتوفقاتش فأنها تكون ناجعة هجوميا، فماتش ممكن يقلق الجمهور حول تكرار هاد السيناريو فالأدوار الإقصائية اللي مافيهاش هامش الخطأ.

تا واحد مايمكن يقول أن كاين سبب تقني كروي واضح لهاد الإخفاق أمام المرمى. المنتخب خلق فرص من الأجنحة ومن العمق وتامن الكرات الثابتة، ونوع فاللعب بأي شكل ممكن يقدر يخليك تماركي، بل وجاو ضربة جزاء وضيعها.

المهاجمين كاملين دالمنتخب كانو متميزين فصناعة اللعب وخلق الفرص وخلق المساحات بدون استثناء، بدرجة أقل من أيوب الكعبي اللي ضيع فرص بشكل غريب، واللي ديما كيخونو “ذكاء” المهاجم الهداف فالفرص السهلة، ولو كان سجل فهاد الماتش كاين غيكتسب ثقة أكبر ويولي عندو تعامل أفضل أمام المرمى فقادم المباريات.

الفشل أمام المرمى مقلق بزاف لأي منتخب، وصداع الرأس لأي مدرب، لأن الأهداف هي الأهم فأي ماتش، وأكيد أن وحيد خاليلوزيتش غتكون ليه هضرة مع اللعابة ورا هاد الماتش، وغيصلح عدة أمور فالتعامل قدام المرمى مع اللعابة.

ولكن مانساوش أن استثمار الفرص بشكل ناجح هو جزء كبير من هاد الرياضة، والمغرب ماعمر لعب معاه الحظ فكأس إفريقيا، كان منحوس فكثير من المناسبات، ومُقلق للجمهور كمتتبع للإخفاقات المتكررة أن هادشي مايعطيناش التيساع خلال هاد التظاهرة اللي عندنا فيها منتخب مخلي رجليه فالأرض وكيقدم مستويات محترمة.

إيلا حيدنا الفشل قدام المرمى والنحس، فالمنتخب قدم أحد أقوى مبارياته. مجهود بدني فخم وتنويع فاللعب، واكتساح هجومي ومترابطات ديال اللاعبين اللي ماقدر المنتخب المنافس مايدير قدامها والو.

جزر القمر ماشي داك المنتخب الضعيف، قصى جنوب إفريقيا فالإقصائيات وعذبنا تاحنا ملي لعبنا معاه قبل. قوة المنتخب هي اللي خلاتو مايشوفش حارس المنتخب بونو، ويبقى فقط يحاول تكسير الإنزال الهجومي المغربي الكاسح.

مبروك علينا التأهل فدورة كلشي كيعاني فيها من سوء النتائج والأداء، وكاين عوامل أخرى منها طبيعية ومنها ماهو مرتبط بوباء كورونا، وتسجيل الأهداف و تطور أداء اللاعبين، خصوصا اللي يلاه رجعو من إصابات مختلفة، فقادم المقابلات غيجي باستمرار التنشيط الهجومي، والوعي بأن فأدوار خروج المغلوب لا مجال لنصف خطأ.

موضوعات أخرى

29/03/2024 06:00

العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه