عفراء علوي محمدي- كود//
قال محمد اليوبي، مدير مديرية الأوبئة ومحاربة الأمراض فوزارة الصحة، أنه لحد الساعة باقي المغرب مستمر فاستعمال مواد “الكلوروكين” و”الهيدروكسيكلوروكين” حيت “مازال اللجنة العلمية ديالنا ماخدات حتى شي قرار بناء على توجيه منظمة الصحة العالمية”، على حساب كلامو.
اليوبي وضح، فتصريح خص بيه “كود”، أن منظمة الصحة العالمية كاتعطي توصيات فقط، وماشي قرارات قطعية كيخص كلشي يلتزم بيها، وكشف أن الدول عندها الأهلية والأحقية باش تدرس هذوك التوصيات استنادا لمعطيات أخرى علمية كاينة عندها، وتقارن عاد تقرر من بعد شنو تدير وشنو تعتمد كبروطوكول، وعلى حساب الوضع شنو كيقتضي.
وبخصوص فعالية الكلوروكين والهيدروكسيكلوروكين، أكد اليوبي أن نتائجو مزيانة، وتزامنات بداية استعمالو مع التحسن فالمؤشرات، خاصة المتعلقة بالوفيات، “وهذشي للأمانة طبعا كيتزامن حتى مع تطبيق إجراءات الحجر الصحي، بحيث مع تطبيق الكلوروكين وفرض الحجر الصحي بدينا كنلاحظو تحسن المؤشرات من بعد أسبوع، وتقلص الحالات اللي كيدخلو لأقسام العناية المركزة والإنعاش بشكل كبير”، كيف قال.
وماشي غير الكلوروكين وإجراءات حالة الطوارئ اللي حسنات المؤشرات، بل حتى “توسيع إجراءات الكشف اللي خلاتنا نلقاو حالات فمراحل مبكرة، وعملية تتبع الخالطين، لحد الساعة صعيب نعرفو نسبة مساهمة كل إجراء فتحسين المؤشرات لانها جات بالتزامن، لكن كيمكن نلاحظو النتائج الإيجابية اللي حصلنا عليها على أرض الواقع”، حسب تعبير اليوبي.