علي الصافي – كود عن ايفي ///
هدد وزير الخارجية والتعاون ناصر بوريطة مدريد باش تساءل “واش الصبليون راغبة فالتضحية بعلاقاتها الثنائية مع الرباط من اجل ابراهيم غالي٬ زعيم البوليساريو؟. هاد الشي قالو فحوار مع وكالة الانباء الاسبانية ايفي اجراه الصحافي خاڤيير اوكتازو
بوريطة قال باللي الرباط كتسنى “جواب مقبول ومقنع” من حكومة مدريد بخصوص هاد الموضوع. فاشارة الى دخول زعيم البوليساريو بهوية مزورة وباسبور جزائري الى لوگرونيو للعلاج قبل ايام.
الوزير اكد باللي بلادو ما توصلات حتى بشي جواب اسباني على اسئلة المغرب بخصوص دخول غالي =اللي فيه كورونا وجا فطيارة خاصة جزائرية.
كما اثار الديبلوماسي المغربي فحوارو مع “ايفي” التناقض اللي كتعيشو المخيمات. ناسها ما عندهم لا كمايم لا جيل وزعيمهم كيتعالج فالصبليون وكينقلوه فطيارة خاصة.
لهجة بوريطة كانت قاصحة بزاف باش هاجم حكومة مدريد. قال “علاش السلطات الصبليونية اعتبرات ماشي مهم اخبار المغرب بوصول غالي لبلادها، وعلاش عزيز على هاد السلطات تنسق مع خصوم المغرب =الجزائر والبوليساريو= ثم واش معقول نسيقو لخبار من الصحافة؟ واعتبر ان هاد المسلسل هو اختبار لمصداقية وثقة علاقتنا ولا داك الشي غير شعارات وصافي.
طبعا فهاد الحوار جبد الانفصاليين الكاطالان. بوريطة قارن بين موقف الرباط اللي خداوه قبل سنوات من زعماء الانفصال فهاد الاقليم وقال “باش مدريد واجهات الانفصال الكاطالاني٬ المغرب كان واضح. على اعلى مستوى رفض كل اتصال معاهم وخبرنا شركاءنا الاسبان. ما قبلناش نتلاقاو مع اي واحد منهم الا بحضور السفارة الاسبانية فالرباط. واضاف انو ما خاصك تعطي بالظهر للشركاء خاصة فموضوع اساسي بالنسبة لينا وهو الصحراء اللي هي قضية وطنية لشعب كولو
ولم يرد بوريطة على تساؤل الصحافي عن اسباب تأجيل اجتماع اللجنة العليات المشتركة اللي كان فدجنبر وتأجل وما تحددش ليه شي تاريخ٬ لكنه طالب من حكومة اسبانيا “الوضوح. اولا خاصهم يوضحو هاد الامور= قضية غالي. قضية كتبين باللي الصبليون كتغمض عينيها على جرائم غالي اللي وصفو بوريطة ب”المغتصب اللي تسامح مع العبودية ومتهم بالاغتصاب وجزائم حرب وتوظيف اطفال كجنود. هنا باش قال الوزير “واش اسبانيا عندها الرغبة تضحي بعلاقتها مع المغرب من اجل هاد الشخص”.
واستغرب الوزير فحوارو مع “ايفي” غياب العدالة فاسبانيا “فين هي العدالة الاسبانية فكل هاد الشي. حتى قاضي ما اتخد شي قرار فالشكايات اللي تقدمات ضدو” فاشارة الى شكايات للجمعية الصحراوية للدفاع عن حقوق الانسان وجمعية كناريا لضحايا الارهاب.
ثم عاد وهاجم اسبانيا وجبد التاريخ وقال “ما نقبلوش نبقاو سجناء الماضي الاسباني” فاشارة الى ان هاد البلد استعمر الصحرا وسيدي ايفني والشمال وباللي العلاقات بين مدريد وسيدي ايفني وشمال المغرب عادية في حين فالصحرا فشي شكل.
بوريطة كان كيكوي ويبخ فهاد الحوار. حقاش رجع وقال باللي المغرب عندو شراكة شاملة سياسية واقتصادية وتجارية وانسانية وامنية مع اسبانيا وباللي مدريد باش تبغي تتآمر وتلعب ورا ظهرنا مع الجزائر والبوليساريو ما نكونوش باينين ليها ولكن باش تبغي تهدر على الهجرة وعلى الارهاب كترجع الرباط “مهمة” وذكر باللي حنا ماشي جوندارم اوربا وباللي الهجرة خاصها معالجة شاملة ماشي بالفلوس بوحدها
