كود فرانسا ///

البارح السبت 17 اكتوبر 2020 نشر محمد التفراوي كاتب فرع حزب العدالة والتنمية بفرنسا بيان فيه ان عبد الحكيم الصفريوي اللي مشدود فقضية قطع راس ارهابي شيشاني لراس استاذ بفرنسا٬ ماشي عضو بفرع الحزب بفرنسا ولا تربطه أية علاقة بحزب  العدالة والتنمية”.

حسب التحريات اللي دارت “كود” فان الصفيري ما كانش مع الحزب لا فالمغرب ولا ففرانسا بل كان مع الذراع الدعوي ليه او الجماعة اللي غادية دير الحزب بعد الالتحاق بحزب الخطيب.
وفق قيادي من الحزب ل”كود” فان الصفريوي كان عضو نشيط مع “الاصلاح والتجديد” =اي قبل ما تولي “الاصلاح والتوحيد” وباللي “تفارق معانا ف1995″ المصدر اكد ل”كود” باللي “الصفريوي كان مناضل نشيط وڤيريلان وبعد ما تفارقنا حقاش ما تفاهمناش٬ بقى ديما كيدافع على قضايا بحال فلسطين وديودوني …ولكن بشكل سلمي” يشرح المصدر ل”كود”.
بخصوص زواجو قال مصدر “كود” باللي كان مع فرنسية مسلمة دايرة الحجاب وكان عند حب وماشي طمع فالجنسية”. هاد الزواج سالى بالطلاق

هاد الاستاذ بان ففيديو قبل قطع الشيشاني الارهابي مول 18 عام لراس استاذ التاريخ بمدينة ضاحية باريس٬ كيسب فهاد الاستاذ وكيحرض ضدو. واش هاد الشي ديال التحريض كان سبب فقطع رأسو؟ هاد الشي اللي غادي يبينو التحقيق.

هاد السيد المتطرف اللي مخبي فالعمل الجمعوي ففرانسا واحد من 10 تم توقيفهم لحد الان وعندهم علاقة بهاد الجريمة الارهابية اللي زلزلات فرانسا واوربا. وقد تم الاعلان عن اقامة تكريم وطني للاستاذ ونظمت امس واليوم عشرات الوقفات اعلنت تضامنها مع الاستاذ ودفاعها عن حرية التعبير فهاد لبلاد.