هناء ابو علي- كود//

محال واش العثماني عارف اش كاتدير  الحكومة ديالو  و خصوصا ف السياسة الخارجية  و خطوطها ،هادي غير سيمانة وزير الخارجية بوريطة دار جولة ف البلقان و تلاقا وزير الخارجية الصربي و دارو ندوة صحفية قال فيها بلي المغرب ماعمرو غادي يعترف باستقلال اقليم كوسوفو و انه مع الوحدة الترابية الصربية، و بالمقابل صربيا تاهي كتقول مع المغرب ف قضية الصحراء..وهاهدشي فرحو به الصرب، وداروه فموقع وزارتهم

القضية د كوسوفو كتشبه لقضية الصحراء، حيث الاقلية الالبانية اللي ساكنة فيه بغات تستقل  بدعم غربي و الباني   والكثير من الدول مامعترفينش بها، في حين الصربيين كايقولو بلي كوسوفو ارض صربية و عطاوها حكم ذاتي.

العجيب ان رئيس الحكومة  غير اليوم دار واحد التويت كايقول فيه بلي  تلاقا ممثل كوسوفو  وقال ليه موقف المغرب لم يتغير و علم الله شنو قال ليه مزال ،واش عارف بلي مجرد لقاءه مع ممثل هاد ” الدولة”  اعتراف بها، وبلي الصرب ماغاديش يفهموه بطريقة اخرى ، كما المغرب ماعمرو يتسامح مع دول صديقة الا مشاو رؤساء حكوماتها كايتلاقاو مع ممثلي البوليساريو مثلا ف مقر الامم المتحدة..

واش فراسو شنو قال بوريطة و شنو هو موقف المغرب المبدئي مع قضية الوحدة الترابية للدول المختلفة و العلاقات المتبادلة… ولا السيد عايش ف عالم اخر اثر فيه موقف حركات الاخوان المسلمين اللي كتبنا موقف مساند للالبان بحكم انهم مسلمين   و فقط و اللي هو موقف عاطفي ما سياسي ما استراتيجي ما تازفتة..

و الاهم واش سي العثماني عارف بلي العالم تبدل دابا  و راه زمن الانترنيت هذا و هاد التصريح ديالو و هاد اللقاء ديالو بدولة مكيعترفش بها المغرب رسميا راه ماغادي يدوز بسهولة، حيث السفارات الاجنبية راه كتراقب و كتدير ملف يومي للتصريحات الصحفية و غيرها ، و دابا السفارة الصربية تدير تقريرها و القضية توصل لحكومتهم و دابا يسولو شنو هو موقف المغرب بالضبط واش معنا ولا مع غانا  وعلاش وكيفاش رئيس حكومتكم تلاقا بانفصالي ، وشنو غادي يكون موقف المغرب لو ان رئيس الحكومة الصربية تاهو غذا يتلاقا بممثل البوليساريو ف البهو د الامم المتحدة؟  و ف الغالب غادي يحلها اتصال هاتفي يقولو ليهم ماتديهاوش فيه  ولا يمكن يقولو ليهم راه ماشي هو مول الحساب  اصلا  “و لا يملك اي حساب في فايسبوك او تويتر”..