كود الناظور///
والي جهة الشرق “معاذ الجامعي”، زعم بزاف فواحد اللقاء نظموه فالناظور وحضر ليه رئيس جهة الشرق عبد النبي بعيوي لي كذب على الناس ديال جرادة ومازال كيتسناوه يقدم استقالتو لي وعد أنه يقدمها يلا ماجاش وفد وزاري.
الجامعي وبيوي دارو اليد فاليد ومشاو للناظور كيبيعو الاوهام للناس، وقاليك غايقضيو على البطالة بمشاريع منها معمل ديال النسيج، وبحال هاد الهضرة تقالت فجرادة وتقالت فالحسيمة ودابا كيقولوها فالناظور.
الخطير لي كان فاللقاء هو لكلام لي قالو والي جهة الشرق، من بعد ما قال أنه ماشي سوقو منين كتجي لفلوس المهم يجيو المستثمرين، سواء كانت لفلوس كاتجي من التهريب أو من بلاصة أخرى، وهاد الاحتمال المفتوح ديال بلاصة أخرى يقدر يكون فلوس حشيش، أو فلوس كوكايين أو شبكة قوادة، ماشي مهم المصدر لموهيم لعاقة تدخل.
دابا يلا كانت الدولة غاتنخرط فتبييض الاموال مافيها باس، غير يكون ديكشي مضبوط ومنظم باش كولشي ينخارط فهاد المشروع التنموي ويرفعو العقوبات على أباطرة الاجرام.
