عفراء علوي محمدي- كود//

عرفات “كود” من مصدر مطلع أن مجموعة من المحامين نوضو الصداع بعدما قام المحامي الشاب المنتمي لهيئة كازا، مراد العجوطي، بإنشاء مكتب محاماة افتراضي، من خلال موقع إلكتروني كيمكن المواطن من ولوج جميع الخدمات القانونية من الدار، ويقوم بتكليف محامي باش يتبع القضية ديالو.

وأكد المصدر بللي بعض المحامين، اللي كينتميو للجناح “المحافظ”، اعتبرو هذ المبادرة ماشي لصالح المهنة، وكتهدد وجودهم فيها، خصوصا وأنهم كيحاربو التيكنولوجيا وكيرفضوها حيت ماكيعرفوش يتعاملو بيها مزيان.

هذ الصداع اللي ناض خلا العجوطي يرجع للور ويوقع فموقف محرج، واخا بزاف ديال الزملاء ديالو حياوه على المبادرة، واستحسنوها بشكل كبير، لسهولتها وفعاليتها.

والعجوطي جاتو فكرة إنشاء مكتب المحاماة الافتراضي استجابة للتحديات الصحية اللي كيفرضها فيروس كورونا المستجد، واللي خلا مجموعة من الناس يمارسو الوظائف ديالهم من الدار.

المكتب الافتراضي كيتوفر على جميع الخدمات اللي ممكن يوفرها مكتب محاماة حقيقي، بنفس الجودة وباستجابة مزيانة، كيف كيمكن حجز موعد افتراضي، بحيت كيتوصل الموكل برابط على الإيمايل، وكيختار الموعد اللي مناسبو، وكيتصل من بعد بالمحامي ديالو من خلال تقنية الفيديو.