كود سبور//

نجح الدولي المغربي يوسف العربي النجم ديال فريق أولمبياكوس اليوناني فتحقيق رقم قياسي شخصي من بعدما تمكن من تسجيل التعادل لمصلحة الفريق ديالو، فمرمى فريق سلوفان براتيسلافا السلوفيكي فالدور التمهيدي ديال “اليوربا ليغ”.

وكان الفريق ديال يوسف العربي متأخر فالماتش بحيث كان الفريق السلوفيكي متقدم فالنتيجة بهدف لزيرو، حتى للدقيقة 86، لي غيرتقي فيها يوسف العربي فوق الجميع وغيهز الشبكة ديال الخصم بهدف جميل من رأسية زوينة، خلات المدافعين والحارس ديال الخصم كيتفرجو فيها وهي كتدخل المرمى ديالهم، الأمر لي مكن العربي باش ينقذ الفريق ديالو أولمبيكوس اليوناني من هزيمة محققة.

الهدف ديال يوسف العربي مكانش عند الفضل فقط تجنيب الفريق ديالو الهزيمة فالماتش، بل كانت عندو أبعاد اخرى، بحيث أن النجم المغربي بهذا الإصابة ليسجل تمكن من معادلة رقم الدولي المغربي السابق مروان الشماخ فالبطولات الأوروبية بمعدل قياسي مغربي كيبلغ 17 هدف فالمسابقات الأوروبية، وأيضا عادل الرقم ديال الدولي المغربي محسن ياجور النجم السابق ديال الرجاء والوداد ونهضة بركان كأفضل هداف مغربي فجميع المسابقات القارية بتسجيلو 37 هدف.