عفراء علوي محمدي- كود//
توفى رجل الأعمال المكناسي، صاحب محلات “بيوكَناش تجهيزات”، لبارح الخميس، بعد صراع مع فيروس كورونا المستجد.
وحسب مصادر مطلعة، فبيوكَناش غير نهار الأربعاء خرج بحالو من سبيطار سيدي سعيد بمكناس بعدما تم التأكد من شفاؤو التام من كورونا، لكن المضاعفات ديال الفيروس خلات صحتو تتدهور، خصوصا أن الرية ديالو تقاصت بنسبة كبيرة، وهذشي خلاه يتوفى من بعد شفاؤو.
وبعد ساعات من الشفاء ديالو التام والعودة للمنزل ديالو، بدا كيحس بيوكَناش بضيق حاد فالتنفس، الشي اللي استدعى نقلو على وجه السرعة لمصحة خاصة، وتماك فين توفى.
وتعرف بيوكَناش بكونو رجل أعمال عصامي، كان بدا بحانوت صغيرة لبيع الآلات الإلكترونية فعقبة السمن فحي الروامزين سنة 1973، وشوية بشوية قدر يدير أول شركة لبيع الآلات فالمغرب، ويفتح محلات خرين فمختلف أحياء مكناس وفاس، حتى استطع من بعد يدير محلات ديالو فكَاع المغرب.
وكذلك تعرفات شركة بيوكَناش بكونها الراعي الرسمي لفريق الرجاء الرياضي، اللي توجه هذ العام بالبطولة.