عفراء علوي محمدي- كود//

تدوينات منتشرة بشكل كبير على مواقع التواصل الاجتماعي كيقولو ماليها أن المغرب دخل فالموجة الثانية ديال فيروس كورونا المستجد، وهذشي حسبهم قالتو منظمة الصحة العالمية، لكن فالحقيقة المغرب باقي بعيد عليها كل البعد.

وممكن سبب نشر هذ الأخبار وتداولها بشكل واسع هو سوء فهم التصريح اللي عطاه منسق المركز الوطني لعمليات الطوارئ العامة بوزارة الصحة، معاذ المرابط، واللي قال فالتصريح الأسبوعي الأخير حول الوضعية الوبائية فالمغرب أن المغرب “باقي فالمرحلة الثانية ديال الفيروس حسب ما قالت وزارة الصحة العالمية”، بمعنى مازال فالموجة الأولى وفالمرحلة اللي كتتميز تحديدا بانتشار الفيروس بشكل محدود ومتحكم فيه، نوعا ما، بين الناس.

وماشي هذي أول مرة يدخل فيها المغرب للمرحلة الثانية، بحيث كان أصلا فيها مللي بداو كيتسجلو إصابات فصفوف الوافدين للمغرب والمخالطين ديالهم فشهر مارس اللي فات، أي بعد أيام قليلة من ظهور الوباء فالمغرب.

وهذ المعلومة جابتها وزارة الصحة من تقرير حديث لمنظمة الصحة العالمية اللي ماعتبراتش أن المغرب وصل للمرحلة الثالثة للوباء، واخا تزادو الإصابات فيه مؤخرا بشكل ملحوظ.

وحسب منظمة الصحة العالمية، فكاينين 5 مراحل ديال انتشار الفيروس فالدول بين الناس: مرحلة الصفر اللي كتكون فيها الدولة فاستقرار تام، المرحلة الأولى اللي كيتسجلو فيها حالات أقل من 10، المرحلة الثانية اللي كيبداو يتسجلو إصابات كثيرة نتيجة لقدوم وافدين أو ظهور إصابات متفرقة، المرحلة الثالثة اللي كيبانو فيها بؤر وبائية كبيرة كتتسجل فيها مئات او الاف الإصابات، ثم المرحلة الرابعة اللي هي الخطيرة كَاع واللي كيتفشى فيها الوباء.