كود اسماء غربي ////

علمت “كود” ان شركة “الصباح” اللبنانية اللي فرضها رئيس هيئة الترفيه تركي الشيخ على “ام بي سي” واللي تكلفات بالانتاج المغاربي بما فيه المغربي هانت لمغاربة وتاريخهم. وفق مصدر ل”كود” فان المصري المتخلف اللي سميتو احمد جلال اللي كلفاتو شركة “الصباح” يتلاقى بشركات الانتاج المغربية دار ڤيتو على “عليان للانتاج” والسبب ما قاله فاجتماع٬ يكشف مصدر “كود” “مولاها٬ ويقصد نبيل عيوش٬ يهودي وحنا ما كنتعاملوش مع ليهود”. اييه اول مرة كنعرفو بديانة عيوش وزايدون ها للي قلنا قبل. هاداك التخلف جاي يضرب قيم فالمجتمع المغربي.

المصيبة ان هاد الشي تقال فاجتماع بحضور منتجين مغاربة وهادو قبلو هاد الهدرة “باستثناء سيدة قالت لهاد المتخلف شكون المغرب ولكن اصر باللي عندو توجيهات” يشرح مصدر “كود”.

دابا هاديك “سيگما” و”فيديوراما” وباقي شركات الانتاج اللي بدات تعاملها مع هاد الشركة وبغض النظر علي المضمون والتوظيف السياسي٬ خاصهم ياخدو موقف واضح. خاصهم كلهم يرفضو التعامل مع هاد التخلف الوهابي اللي مغطي فثوب الفن