عفراء علوي محمدي- كود//
قالت اعتماد متواضع، مديرة المستشفى الاقليمي بنمسيك، أن مسار التخلص من النفايات الطبية الخاصة بالمصابين بفيروس كورونا المستجد كينطبق على جميع المستشفيات فالمغرب، وأكدات بللي وزارة الصحة مسطرة توصيات كيخص جميع المراكز الاستشفائية تلتزم بيها.
وكشفات متواضع، فتصريحها ل”كود”، بللي سبيطار بنمسيك داير عقدة مع شركة معتمدة فهذشي ديال النفايات الطبية، وهي شركة معروفة كتتكلف بالنفايات الطبية ديال المستشفى العسكري فالرباط وجميع المستشفيات الجامعية.
وبالنسبة لنوعية النفايات الطبية الخاصة بالمصابين بالفيروس، كتقول المديرة أن الأمر كيتعلق بالضمادات والأدوات الطبية والكمامات والبلوزات الوقائية، والمناديل أو الأدوات اللي كتكون موسخة بالسوائل البيولوجية بحال البول والدم، والنفايات اللي كتخص مرضى “كوفيد 19” وكَاع الحوايج اللي كيكونو قاسوهم، بحال الصحون والكؤوس والأكل.
وزادت كاتقول، فحديثها على مسار التخلص من هذ النفايات: “كنديروها فأكياس حمراء، والأكياس فحاويات صفراء، هي بحال القمامة، لكن قمامة “سبيسيفيك” مستطيلة ومكتوبة عليها “آطونسيون”، وكتسد بصفة محكمة، كنشدوها كنعقموها وكاتمشي، الشاحنة اللي كتنقل هذ النفايات كاتدوز 3 حتى ل4 مرات فالسيمانة، وهي شاحنة مختصة كتدي هذ النفايات الطبية الخطيرة للمحرقة”.
وحالة ماجاتش الشاحنة أو تعطلات “عندنا مستودع احتياطي كنحطو فيه هذ الحاويات إى كثرو، فانتظار تجي الشاحنة”، على حساب هضرتها.