هناء ابو علي كود كازا//
جمعية الربابنة الطائرات ماقدهاش التهديد بالاضراب دابا مشات عند جنوب افريقيا اللي معروفة بمواقفها ضد المغرب تطلب منها ضامن مع ليبيلوط.. وهاد الاخيرة: هادشي اللي دارتو لارام “تطهير عرقي”!
من بعدما الخطوط الملكية المغربية سرحو 65 بيلوط فالمرحلة اللولة، الجمعية المغربية لربابنة الطائرات AMPL كانت خرجات ببيان قالت فيه انهم مستعدين يخفضو كتلة اجورهم ب400 مليون درهم على 3 سنين، ويوفرو تكلفة الفصل الاقتصادي، المقدرة بتقريبا 250 مليون درهم.. وهددو بانه فحالة الرفض غادي يديرو إضراب.
ومن بعد هاد البيان، الجمعية ديال البيلوط زادت صعدات، وهاد المرة ب”طلبها” من جمعية جنوب افريقيا لربابنة الطائرات ALPA-SA تعاونها وتضامن معها.
الجمعية الجنوب افريقية استجبات، ورئيسها راسل لارام، واكد فرسالتو تضامن الجمعية لامشروط مع ليبيلوط، اللي قالت انهم كيعانيو من عواقب هاد التسيير الكارثي.
هاد الجمعية ماوقفاتش هنا، بل زادت، وسمات التسريح اللي دارتو لارام للربابنة ب”التطهير العرقي”، وقالت ان هادشي غادي يخلق جو طوكسيك وفيه الخلعة وغادي يأثر سلبيا على سلامة الطيران فشركة لارام وبالتالي فالمنطقة كلها.
وفختام رسالتها، طالبات الجمعية الجنوب افريقية، من الخطوط الملكية المغربية باش تعيد النظر فقرارها، وتبدا مفاوضات جداد مع ممثلي الربابنة باش يلقاو حلول افضل غادي تمكن هاد الاخرين يبقاو فخدمتهم.
دابا عادي جدا جمعية ربابنة الخطوط الجزائرية او حتى جنوب افريقيا تتضامن معاهم. غير اللي قودوها فيه هاد الجمعية هو الطريقة باش تواصلو. الطريقة باش هدرو مع لمغاربة. ايام بنهيمة باش كانت حرب كبيرة كان عندهم رئيس ذكي وتواصل مع المغاربة ووصل قضيتو. اليوم عندهم رئيس غبي حتى باش بغى يسوق فاخر ساعة خطابو مشى دار لفرنساوية. شفتو الغباء
دابا حتى السياسيين اللي يقدرو يدعموهم يرجعو اللاور باش علنات جنوب افريقيا =ليبيلوط= والجزائر =لبيلوط= دعمها ليهم.
هاد الفشل فاش يوصلو قضيتهم بدا من نهار بدات الجايحة. اولا عطاو 3 الاف درهم مساعدة فصندوق كورونا. تصورو كاين اللي كيشد فيهم 15 مليون سنتيم وعاطي 3 الاف وموظف كيشد 10 الاف فلارام وعاطي 10 الاف.
زادوها باستمرار حصولهم على تعويضات واخا ما خدامينش. باش خرج قرار اعادة هيكلة لارام وفيه الاستغناء على بزافت المستخدمين و65 بيلوط بقاو كيهدرو غير على ريوسهم. ما تسوقوش للخراين.
هما باش تعين عدو فبلاصة بنهيمة اعتاقدو انو ضعيف ويقدرو يغلبوه. حگروه وهو يعميهم. ياك كيقولو لمغاربة العود للي تحگرو يعميك.
قضيتهم خاسرة. فهاد الوقت خاص يغيرو الاستراتيجية. هاد الشي باش يختارو شي حد فبلاصة هاداك اللي خدا شي 400 مليون او 390 مليون سنتيم وباقي كيهدد بالاضراب فوقت كاع طيران العالم مدگدگ.
