سهام البارودي – كود //

هاد سدان الحدود راه مصيبة اقتصادية و اجتماعية كبيرة ! كان مفهوم السدان فالاول فاش كانو گاع الدول سادين على راسهم و كان الفيروس مازال مجهول و الاطباء و العلماء مازال ماعارفينش كيفاش كاينتاشر و كيفاش ممكن التعامل معاه !
اما دابا ! مورا هاد حملات اللقاح و الادوية و البروطوكولات العلاجية و خصوصا مع هاد المتحور اوميكرون لي المجتمع العلمي كامل كايقول انه خفيف بزاف بالمقارنة مع المتحورات الاخرى فراه ماعند المغرب حتى سبب مقنع باش يبقا ساد على عباد الله !

ولكن باش يولي السدان و العنصرية هادي راه مصيبة كبيرة و سبة فحق المغرب لي باغي يصور راسو كدولة حداثية ! دولة الحقوق و المواطنة ! دولة كلشي فيها سواسية ! حيت ماشي معقول هاد السدان يخضعو ليه غي المغاربة المزاليط لي باغين يدخلو شوفو واليديهم و حبابهم في حين يتفتحو الاجواء للطيارات الخاصة و اليهود لي باغين يحتافلو بشي مناسبة دينية ديالهم !

واش القانون مابقاش يسري على جميع المغاربة و لا  على حساب الانتماء الديني ديالهم و لا الكونط بونكير وواش تقدر تدخل فطائرة خاصة ولالا ؟!

كعية جديدة غاتزاد فالبالماريس ديال الكعيات ديال هاد الحكومة ! سوء التواصل و السدان و مكلملينها و مجملينها بهاد العنصرية !