كود تطوان ///

البارح الاحد 23 ابريل 2022 المخزن فالمضيق تلف. لقى فالحيط بمدخل المدينة حدا المجزرة وقبالة الملعب كتابات حائطية ضد الزعيترات.

حسب صور حصرية عند “كود” وحدة تكتب فيها “مرحبا ابو زعيتر بالمضيق وسكانها سيرحلون للجزائر” والثانية تكتب فيها “الى عامل المضيق: كلنا مغاربة”.

وفق مصادر “كود” فالسلطات كتاشفاتها وناضت العافية. حسب مصادر “كود” فاقو لقاوها فالصباح والسلطات كلها تحركات وصبغوها قبل ما يوصل منتصف النهار. دابا ما معروفش وقتاش تكتبو. واش فليلة السبت ولا صباح الاحد.

رسومات حائطية نددات بتسلط الزعيترات. هاد القصة كيف سبق وكتبات عليها “كود” بدات بعد منح عمالة المضيق لفنيدق الجمعة 22 ابريل 2022 لشركة يملكها الإخوة أبو زعيتر وفق ما كشف عنه قرابة 1200 متر مربع لاستغلال الملك البحري بمارينا سمير.

فاللول عطاوها الفين متر مربع وباش ناض الصداع نقصو للزعيترات 800 متر مربع.

والمشكلة ناضت لان البلاصة اللي خداو فيها الرخصة هما اللي ختاروها ماشي البلاصة اللي قتارحاتها عليهم اللجنة التقنية المختصة بعمالة المضيق. خرج قرار عاملي صدم المهنيين وصحاب الشركات للي كتستغل الملك البحري فمارينا سمير واللي العمالة ما جدداتش ليهم رخصهم.

دابا المهنيين كيقولو باللي شركة ابو زعيتر بدات الاشغال وناس فالعمالة كيقولو راه ما تعطات حتى رخصة والمتضررين باغيين يديرو وقفة للاحتجاج. قبل الوقفة بدات الكتابات