هناء ابو علي كود كازا ////

فهاد العام ديال الجايحة 2020 خرجات شركة للعقار اسمها “البغدادي گروب” اللي كانت صغيورة فبرشيد ودخلات لكازا. وفق ما علمته “كود” فهاد المجموعة شرات اراضي باش دير عقارات قيمتها 50 مليار. وقع هاد الشي فالحي الحسني وسيدي معروف وعين الشق وفالرحمة بدار بوعزة وحتى عين السبع.

باش تشري بحال هاد الشي فزمن كلشي واقف فيه خاصك جوج: تكون عندك اموال كثيرة عليها شبهة وباغي تبيضها وخاصك تكون عندك علاقات واسعة وكتعرف تصاميم التهيئة فالوكالة الحضرية للدار البيضاء. طاشرونات كثار كيقولو عندو كالة صحيحة فهاديك الوكالة الحضرية.

لكن شكون هاد “البغدادي گروب”؟ ومنين جاو ناسها؟

خاصنا نرجعو لعامين هادي. قناة “فرانس 2” دارت تحقيق عنوانو: الحشيش: تبييض الاموال المتعدد الجنسيات. التقرير ضمن برنامج “كاش تحقيقات” تتبع طريق تبييض الاموال بين المغرب وفرنسا تحديدا الدار البيضاء وباريس. هاد الشي كان فاكتوبر 2019. صحافي فرنسي جا لكازا باش يتلاقى مع صراف قام بتحويل الاموال مباشرة ودون وساطة بنكية من البازارات الى احد احياء باريس تسلمتها صحافية في القناة اخفت هويتها.

التحقيق اللي نشرته القناة الفرنسية تحدث عن شبكة علاقات يقودها مغربي يدعى نور الدين الشاوطي يستقر بالدار البيضاء ويدير شبكة صرافة لاموال وتبييضها. هاد الشاوطي هما جوج خوت. لكن غير نور الدين اللي تقدم على انو مساهم اساسي فهاد الشركة ديال العقار “البغدادي گروب”. هاد الشخص مبحوث عليه وعندو علاقات بشبكة كتخدم الصرافة بين كازا وباريس لتبييض الاموال ومن بعد كيحولوهم لانفريس البلجيكية باش يوليو صفائح ذهب وكيمشيو للامارات ويرجعو فلوس وكيدخلو فاستثمارات ضخمة فدول كثيرة منها المغرب. الاخطر ان مجموع ما حولوه هادو من ذهب فاق اللي كتحولو الدولة المغربية كولها. مع هادو كانت فضايحنا قبل سنوات على تهريب الذهب من المغرب.

بشارع عبد المومن فكازا، الذي بثت القناة الفرنسية صوره وعنوان يحمل اسم “البغدادي گروب”. نور الدين الشاوطي الصراف المبحوث عليه ففرانسا راه مساهم اساسي فهاد الگروب . اذن نجحت مجموعة البغدادي في ولوج اقتصاد البيضاء بعدما عملت على ادخال هذه الاموال بشتى الوسائل في السيرورة العادية لمالية الابناك و ذلك عن طريق ضخها في مجموعة من المشاريع او شراء مجموعة من العقارات بمدن مختلفة داخل المملكة المغربية بمباركة مسؤولين نافذين. بالاضافة الى علاقات مشبوهة مع بعض المسؤولين الجزائريين، يستقرون في فرنسا، و الذين يبحثون عن اقتناء عقارات بمدن استراتيجية بالمملكة لاغراض تبقى موضع تساؤلات.

يستفيد اسم “البغدادي”، الذي اتخد من العاصمة الاقتصادية مقرا لجميع علاقاته في ادارة في عمليات كبيرة للاتجار او صرف العملات تحقق فيها الشرطة الفرنسية في باريس منذ سنة 2015.

و بذلك نجح نور الدين الشاوطي المساهم الرئيسي في مجموعة “البغدادي” في تاسيس مجموعة من الشركات من بينها شركة خاصة بالبناء و شراء الاراضي بمدينة الدارالبيضاء باقامة عبد المؤمن و التي تعد غطاءا لجميع المعاملات التجارية في ميدان العقار. وهي المجموعة نفسها التي كانت موضوع عمل استقصائي للقناة الفرنسية الثانية.

“كود” رجعات تتقلب في اسم مجموعة “البغدادي” الذي ورد في التحقيق الفرنسي بعدما اتضح انه اثير ايضا في تحقيقات الديستي على خلفية اعتقال اعضاء شبكة الكوكايين جاية بيرو سنة 2016 افضت الى اعتقال ثمانية متورطين بينما لا يزال المتهم الرئيسي في حالة فرار خارج المغرب.

هاد القضية اللي طار بسبابها الوكيل العام فوجدة =سوء تدبيرها=٬ تورطو فيها جوج طاشرونات كبار دابا فكازا. واحد منهم دار عرس لولدو وخرق حالة الطوارئ الصحية وما هضر معاه حد. وفق ما علمته “كود” فهاداك الطاشرون اللي كان فهاد القضية تلاقى مع المتهم الرئيسي فيها فاسبانيا ف2017 فاوطيل تماك. دوزو 5 دقايق وتافقو على طريقة التواصل بيناتهم مستقبلا باش يبقاو متعاونين.

يذكر ان الشرطة القضائية الولائية بوجدة سبق وان استمعات لجوج طاشرونات: العلام و العلمي وطلقاتهم حقاش الفاعل الرئيسي غبر. دابا مازال هربان. صحف كانت كتبات ديك الساعة باللي كاين اتصالات بين زعيم العصابة وعدد من متورطي الشبكة

من الناس اللي صحاب وعشران ماس “البغدادي گروب”٬ كاين الحاج الشريف اللي كان دوز 6 سنين فالحبس والتهمة المخذرات. السيد دابا ولى اكبر مالك قهاوي فكازا وداز حتى الفنادق.

من الاصدقاء ديالهم كاين شي برلماني ديال التراكتور فوجدة وهو نسيب رئيس جهة ٬ عندو صحبة كبيرة مع هاد شي مساهمين فهاد المجموعة. كاينين طاشرونات ملايرية خراين بانو فكازا

واش هادو ما كيعرفو والو على ماضي الشاوطي؟ هاد الشي غادي يبان فالمستقبل. حقاش هاد الشي ما كيتخباش.