كود سبور//
رجع الدولي المغربي زكرياء بوخلال للتألق بعدما داها غير فالكرة وبعد على الفضايح، وهذا الشي من المشكل اللي وقع له مؤخرا مع نائبة عمدة مدينة تولوز والحملة المضادة اللي دار هو وشي كوايرية بفرنسا على “المثلية الجنسية”.
زكرياء بوخلال قدر يتألق السبت مع فريق تولوز، ورجع يماركي، ونجح فتسجيل التعادل للفريق أمام أوكسير ضمن الدورة 37 من بطولة فرنسا بعدما كانوا خاسرين فالنتيجة ديال الماتش بواحد زيرو، لكن بوخلال قدر يضرب التعادل بهدف فالدقيقة 45، وظلت النتيجة كما هي حتى سالات المباراة.
ورفع زكرياء بوخلال رصيد الأهداف ديالو مع تولوز الفرنسي هذا الموسم إلى 14 هدف، وماركا 9 منها بالبطولة الفرنسية و 5 سجلهم فكاس فرنسا اللي ربحوه هو وصحابو قبل أيام، مع العلم أن الناخب الوطني وليد الركراكي وجه له الدعوة باش يجي للمنتخب المغربي فماتش أميكال ضد الراس الأخضر وفماتش إقصائيات كاس إفريقيا 2023، ضد جنوب إفريقيا.S