كود علي الصافي العيون ///

فهاد الاعتراف الصبليوني بسيادة المغرب على صحرائه خلق نقاش فالصبليون وغادي يبان اكثر على شكون ممثل هاد الفئة من السكان. واش ناس البوليساريو اللي عندهم دابا فالمخيمات وفظروف خايبة٬ اقلية٬ ولا السكان اللي عايشين فالمدن الصحراوية بالجنوب المغربي. من لعيون ودوز على السمارة وهبط حتى الحدود الموريتانية.

هاد الشي اللي جبداتو ليهم ادريانا لاسترا القيادية فالحزب الاشتراكي الاسباني “بي سو وي” فلقاء حزبي باستوريا. 

قالت باللي الموقف الاسباني الجديد خبار زوين وباللي بدات مرحلة جديدة فالعلاقات بين الدولتين وان هاد الموقف كيتجاوب ماشي غير مع مواقف مدريد والرباط بل حتى مع جزء مهم من الشعب الصحراوي. 

هادا تحول كبير فموقف الحزب اللي كيقود الائتلاف الحكومي فالصبليون. نقطة ديما كان كيقولها المغرب ولكن ما كيبغيوش الاوربيين يسمعوها. كيقول ليهم باللي فالمناطق الصحراوية بالجنوب المغربي كاينة غالبية السكان وباللي هادو كينتاخبو ممثليهم بكل ديموقراطية وباللي المشاركة فالانتخابات بالصحرا كتوصل ل70 بالمائة وباللي فتندوف ما كاينة لا انتخابات لا حتى شي حاجة وباللي عدد السكان اللي رافضة دير ليه احصاء الجزائر والبوليساريو ماشي بالكم لكبير اللي كيروجو ليه.

نرجعو لتصريح المسؤولة الاسبانية فالحزب الاشتراكي. فهاد التصريح كانت واضحة كذلك٬ باش وضعات هاد القرار فسياقو العام. قالت باللي كاين سياق دولي متقلب وباللي بلادها دارت من التعاون والتفاهم واحترام الدول اساس علاقاتها الخارجية. 

وذكرات باللي قالو وزير الخارجية الاسباني اللي قال باللي ما قررته اسبانيا مازال اطارو العام هو حل تحت الاشراف الاممي