كود كازا ////
تدوينة مزيانة دارها الاستاذ الباحث عبد اللطيف اكنوش بخصوص قضية حمزة مول الفيراري واعتقالو البارح فالدار البيضاء. الباحث بجرآته كتب تدوينة على الفايسبوك بعنوان “التخربيق عند سكان جزيرة الواقواق…المندبة كبيرة، والميت، فار!”
قال ان الشاب كان سكران ودار كسيدة “ماكاين مشكيل…كًاع ولاد الق…..، حازقين ولا مرففحين، كايديرو الوعاوع”. واضاف “مللي حضرو البوليس ولقاوه سكران، يعبرو ليه نسبة الكحول في الدم، ويشددوه عندهوم أو يدديوه للصبيطار إيلى دعات الضرورة لذلك، والمسطرة تمشي عادية بعد مايحررو محضر بالمنسوب إليه إذا ثبت…لأن السياقة في حالة سكر جريمة خطيرة…عاد آخويا يديرو الكوسطا ديالهوم ديال الكسيدة بالخسائر المادية، وسددينا”،
واضاف اكنوش “اما تجيني تدير الكوسطا، وتغممض على الجريمة ديال االسكر العلني المقرون بالسياقة الخطيرة، ومن بعد تقول ليا حكًكًا :”خلليناه مشا، ومن بعد شدديناه في الدار البيضاء باش نستامعو ليه على الفيديو”، وتبغي تصلح أخطاءك القانونية والمسطرية، سير عاود لكررك…الفيديو ماشي حجة قانونية إطلاقا…السيد آسيدي كان كايمثل فيلم ديال “مهمة مستحيلة” في بلاصة “طوم كروز”، شغلك؟ آجي حييدها ليه من فممو….ماعاينتيش من اللول وسججلتي الوقائع في محضر رسمي”.
وختم “الفيراري ولا سوليكس ولا “داسيا”، هذا كلام ديال الكونسيارجات والمداويخ والحاقدين، باش مانقولش ديال ولاد الق….. المساميم والحازقين للي مراض…مع أن الحزقة ماعممرها كانت عيب أو عار أو أنها تدفعك للحقد على للي عندهوم”