عفراء علوي محمدي- كود//

علنات وزارة الصحة على الشروط اللي خاص المواطنين المغاربة أو الأجانب يتبعوها باش يسافرو للمغرب او برا، عبر الرحلات الجوية او البحرية اللي غتكون ابتداء من 15 يونيو 2021.

وهكذا قسمات الوزارة، فالبروتوكول ديالها الصحي من أجل السفر الدولي، الدول المسموح بالسفر ليها او منها للمجموعة a و b، حسب تقييم الخطورة الصحية من خلال مجموعة من المعايير، وهذ الكلاسمون غادي يتحين 2 مرات فالشهر فكل مرة وقع تغيير.

بالنسبة للشروط، فاللي بغا يسافر من وإلى البلادان فالليست a خاصو الباسبور التلقيحي أو شهادة كتثبت أنه ملقح طوطالمون،  أو تيست pcr سلبي مايفوتش 48 ساعة، وكيخص ملء استمارة صحية قبل الاقلاع، كيمكن تحميلها من موقع الوزارة، او كتتوزع خلال الرحلة، كتدار فيها معلومات المسافر ورقمو الهاتفي وكيتم تعقبو الى احتاج ف10 ايام اللي كتبع الوصول ديالو للتراب الوطني.

وباش تسهل الرجوع ديال المغاربة فالخارج من خلال البحر، غدير وزارة الصحة مختبرات متنقلة فالباطوات ديال التراجيات الطوال ديال تحاليل لpcr.

اما بالنسبة لدول ليست b فموقف منها وليها السفر، باستثناء اللي عندهم ترخيص استثنائي كيتعطى من القنصلية، ويديرو عاد تيست سلبي فاقل من 48 ساعة، وحجر صحي 10 ايام يدار من السلطات المحلية،
بالإضافة لتيست pcr فاليوم التاسع.

وهذشي، حيت لليست اللولة فكتتعلق بالدول اللي عندها معطيات متوفرة متعلقة بالحالة الوبائية وبالسلالات الجديدة، والحالة الوبائية فيها متحكم فيها، والليست الثانية كتعلق بالدول اللي فيها انتشار لسلالة غير سلالة Alpha اللي تم تسجيلها فالمغرب، واللي المعطيات ديالها ماكايناش او ماكافياش، وعلى درجة معينة من الخطورة.

ووزارة الصحة قالت، فالبروتوكول ديالها الصحي من أجل السفر الدولي، أنه تدار من أجل تقليص خطر انتشار السلالات الجديدة من فيروس كورونا فالمغرب، وكذلك لضمان استئناف الرحلات الدولية والإقلاع السياحي فالبلاد.

لكن هذشي ماشي ساهل، حسب نفس البروتوكول، بحيث هذ الرحلات تقدر تنجم عليها مخاطر، تنضاف على مخاطر رفع القيود على التجمعات والتنقلات اللي كانت مفروضة فرمضان. والخطر كيطلع على حسب وجود المعلومات الوبائية والمتعلقة بالقدرة على الكشف والمراقبة الوبائية فالدول المراد السفر إليها أو منها، بالإضافة لوتيرة تطور الوضعية الوبائية، ومستوى انتشار السلالات الجديدة.

بالنسبة شنو هي الدول اللي فكل ليست، فكاينين هنا فموقع الوزارة:

https://www.sante.gov.ma/sites/Ar/Pages/activites.aspx?activiteID=243