الماتش سالا بنتيجة 2 لبيوتا لزيرو، وفقمة النشوة اللي كيحسو بها المغاربة فرحا بالرباح والشعور بمرارة ألم الخسران اللي عند البلجيكيين خرج من جديد نجم آخر باش يعطي الدروس فالروح الرياضية والإنسانية والتعايش، نجم بلجيكا إيدن هازارد اللعاب اللي قرا البلجيكيين معنى احترام الخصم فماتش ديال الكرة والتعايش من بعد الماتش وخلى المغاربة يحتارموه ويصفقو له.
نجم المنتخب البلجيكي واخا بعد بزاف على النيفو الكبير اللي ولفوه فيه عشاق كرة القدم ومنهم المغاربة ملي كان مع تشيلسي بسبب الإصابات اللي تعرض لها مع ريال مدريد، ما خلاهش هادشي ينسى الروح الرياضية والتعايش والتسامح وتقبل الاختلاف، وهادشي أكدو البارح من بعدما سالا الماتش ما بين المغرب وبلجيكا، ملي طلب التوني ديال اللعاب المغربي الشاب بلال الخنوس اللي فضل يلعب للمغرب بلادو الأصيلة على بلجيكا اللي تزاد وتربا فيها وتكون فالأندية ديالها.
وكمل هازارد الجيست ديالو وشد التوني ديال المنتخب الوطني المغربي ولبسو لولدو قدام العالم والجمهور البلجيكي والمغربي اللي فالتيران، فقمة ديال الروح الرياضية والتسامح وتقبل الهزيمة، اللي بغى اللي بغى ورفض اللي رفض كتبقى هزيمة فرياضة كرة القدم وهادشي اللي أكدو النجم البلجيكي اللي قال للعالم بلي 90 دقيقة سالات وراه كتبقى غير لعبة وكنرجعو صحاب وماكين والوا، وفهاد الوقت اللي كان فيه هازارد كيعطي دروس فالروح الرياضية للعالم وماشي غير للبلجيكيين والمغاربة، كانت نايضة الروينة فبروكسيل عاصمة بلجيكيا، حيث المغاربة اللي هما أكبر جالية تما محتافلين بالرباح والبلجيكيين كاعيين بسبب الخسران، وحاقدين حيث بالضبط مع المغرب اللي كيشوفوه خطف منهم مؤخرا مواهب كروية شابة وعندها مستقبل فحال بلال الخنوس وأنس الزروري وآخرين حيث تكوينهم كان بلجيكا.
صحيح أن إيدن هازارد عطا درس فالروح الرياضية، ولكن فنفس الوقت حط كلشي فموقف محرج وفمقدمتهم الزملاء ديالو فمنتخب بلجيكا فحال تيبو كورتوا اللي خرج معصب من التيران وما تقبلش الخسران، ولكن راه حط حتى اللعابا ديال المغرب فموقف محرج وحتى حد ما تكلم عليه ولا طرح سؤال عليه وقال: “واش اللعابا ديال المنتخب الوطني المغربي قادرين يديرو نفس الحركة تجاه الخصم كيفما الجيست اللي دار إيدن هازارد نجم المنتخب البلجيكي تجاه توني ديال المنتخب المغربي ؟ واش المغاربة وبالضبط الجمهور المغربي ديال كرة القدم يقدر يتقبل لعاب مغربي خسر ماتش وياخد توني ديال الفريق الخصم ويلبسو ولولدو؟”.