عفراء علوي محمدي- كود//

كيصعاب التصديق بللي ممكن إنسان ينعس إنسان فثواني معدودة، أو يتحكم فحركاتو، فقط عن طريق التنويم المغناطيسي، أنس دو الفقار اللي كيبلغ من العمر 24 سنة كيأكد أن هذشي ممكن من خلال التنويم المغناطيسي، وماشي سحر أو كذوب…

كيعتبر راسو العربي الأول فالتنويم المغناطيسي بدون منازع، أنس تعرف على هذ “العلم” مللي كان باقي صغير، ومن خلال مجموعة من الفيديوهات على “يوتيب”، خصوصا فيديوهات المنوم الكندي “ميسمر”.

كيقول أنس، فحديثو ل”كود” ففيديو مصور، أنه واعر فذكشي ديال التنويم المغناطيسي النفسي والعلاجي والرياضي، وكيأكد أن عندو قدرة خارقة فعلاج الناس من مجموعة من الأمراض، بحال شلل الصدمة والإدمان عن التدخين والأرق وعمى الألوان والآلام بمختلف أنواعها عن طريق التخذير الكلي أو الموضعي، كيقول، فحديثو ل”كود”: “بحال مثلا بالنسبة للتدخين، فاستطاعتي نخلي الإنسان مايعاودش يدور بالكارو نهائيا، وغير فخمس حصص عمرو يعاود يحمل يشم ريحتو”.

وقال بللي العلاج بالتنويم المغناطيسي ماشي جديد، بل هاذشي كان فقديم الزمان، وتحديدا فعهد الفراعنة اللي كانو كيستعملوه لعلاج الامراض النفسية والعضوية.

وردا ليه على المنتقدين، كيقول أنس: “كين اللي كيقوليك أنا كنكذب، أو هذشي تخربيق، أو سحر، أو سماوي، بالعكس، هذا علم بعيد كل البعد عن السماوي، هذوك طلاسم جنية وسحرية، والتنويم المغناطيسي بريء من هذشي كامل، بل هو قسم من اقسام علم النفس، وبالنسية اللي كيقوك أنني كنكذب، فانا كنطلب منو يجي يخلص الدورات التكوينية اللي كندير داخل المغرب وخارجه عاد يحكم”.

وبالنسبة لأنس فهذ العلم مكايشكل حتى خطر على الناس، لأن اللي ممكن يتنوم مغناطيسيا هو الشخص اللي عندو رغبة كبيرة بزاف، وثاق فالمنوم وسلم ليه راسو، أم أشخاص آخريف فميمكنش، كيف ما اكد انس انه كيدير دورات تكوينية فالتنويم المغناطيسي فقط للناس المحلفين واللي كيهتمو بمجال الصحة وعلم النفس، بحال “ليبسيكياطر” و”ليكوتش” والأطباء والممرضين.

وفختام حديثو المصور مع “كود”، طالب أنس الجهات المسؤولة باش تعترف بهذ العلم اللي قال أننا قادرين من خلالو نصنعو المعجزات، ويمكن يخلينا كذلك نعالجو أمراض مايقدرش يعالجها أي طبيب نفسي.