كود القاهرة ///

هاد المصريين عالام. ناض هاني ابو ريدة رئيس الاتحاد المصري لكرة القدم استقال من منصبو واقال حتى المدرب. قاليك علي اقصاء الفراعنة فالثمن البارح ضد جنوب افريقيا.

شي مغاربة قالو وعلاش ما يديرهاش لقجع ويحيد رونار. لا علاقة بين المغرب ومصر. لقجع عندو مكتب جامعي يقدر يحيدو. هو اللي انتاخبو. يقدر طبعا يستاقل. المدرب هاديك قصة اخرى.

لا علاقة بمصر نبداو بالسياسة وندوزو للكورة. السيسي نظم كان الكاس لانو كان محتاج ليه. الاقتصاد واكل لعصا فمصر. دولار واحد وصل ل17 جنيه. قبل الكان مات الرئيس السابق محمد مرسي فالسجن. منظمات حقوقية دولية اتهمت النظام بعدم تقديم ادوية للراحل كانت ممكن تنقد حياتو. السجناء السياسيين فمصر وصلو عدد كبير. الديموقراطية ما كايناش اللي دوا يرعف. راه عادي باش خرجو المصريين من الكان السيسي غادي يتقلق. وباش يبردو علي المصريين خاص شي حد يضحيو بيه. كاين رئيس الاتحاد وكاين المدرب.

هاد الشي فيه السينما. مصر كان فيها التنظيم الخايب والامن اللي فايت الحدود فماتشات الكان اللي عندهم والغياب ديال الجمهور على الماتشات. الكان ما دارش الا بهدف يجيبو الكاس ومصر كلها تفرح. اللي مشى للقاهرة راه كيتخلع. حتى حد ما ماديها فكاس افريقيا الا نهار ماتش مصر. القاهرة اللي صعيب تتحرك فيها كتوقف باش يلعب منتخبهم. الكورة عندها دور كثر بزاف بزاف من الرياضة. ثم راه السيسي زار المنتخب والاعلام ديالو كلو طبل لزيارة تداريب المنتخب. السيسي دار رهان خرج ليه فالزيرو.

ثم كاين مسألة رياضية. تاريخ مصر فالكان ماشي هو تاريخنا. راهم داو بزافت الكؤوس . رابح 7 الكؤوس افريقية. لعب فينال اخر الكاس فالغابون ضد الكاميرون. ماشي بحالنا اللي عندنا كاس واحد ولعبنا نهاية وحدة وجوج مرات نص النهاية. يعني ما عندنا والو. مصر ديما خاصها الفينال وباش تخرج فبلادها فالثمن راها قاصحة.

علاش نتقارنو فيها. علاش. خاص المحاسبة. ولكن بطريقتنا. حتى حنا عارفين باش مسگية كورتنا مزيان.